PSG chakna Dembele

Ousmane Dembele-a'n match zawnin hattrick a siam hem mai! France international forward goal thum khung hmangin Paris Saint Germain chuan Brest chu 5-2 in an hneh a, Luis Enrique naute hian Ligue 1 table hma an hruaina an sawhnghet.

Inrinni zan khan Stade Francis Le Ble-ah PSG an lenglut a, a khat mawi tawkin goal an khung deuh reng. Dembele bakah hian Goncalo Ramos chuan goal hnih a khung, mualneitu lam tana Romain del Castillo leh Ludovic Ajorque te goal khungin awmzia a nei phak lo.

Barcelona aṭanga PSG pantu Dembele hi Enrique kaihhruaina hnuaiah a khel ṭha thei hle, thu inhmuh loh vanga inbakkaih lai nei mah se tunah chuan an boruak a ṭha takzet - Ligue 1 hma hian Champions League-ah hattrick a siam zo chiah bawk a ni.

PSG manager Luis Enrique chuan, "Ousmane hi goal hmaah a inringtawk a nih phawt chuan a duh zawng ti turin theihna a nei, khawi hmun aṭang pawhin goal a khung thei emaw tih mai tur a ni a, mi bik a ni chiang hle.

"Kan khingpui kha Champions League khel phak an ni a, chuvangin match awlsam a ni lo tih a chiang. Mual sir aṭangin ball an cross nasa hle a, ṭhenkhat kha chu kan inveng seng lo lek lek a ni, mahse ka naute khan ṭha takin an chingfel thei," a ti.

Paris club hian Ligue 1 season kal laiah match 20 aṭangin point 50 an hmu thei a, anmahni hnaih bertu Marseille aiin point 13 zetin an sang zawk. Tun hnai kum 13 chhunga a vawi 11 nan league nomawi chu an chawi leh mai a rinawm.

Tun thla chhungin Champions League playoff an khelh a ngai dawn, European football inelna sang bera last 16 dinhmun luah tur chuan anmahni ang bawka Ligue 1 club Brest hi an paltlang a ngai dawn a ni.