Doncic leh Davis boruakah James a langsar

Luka Doncic leh Anthony Davis ten team an inthleng dawn! Player ṭha bik pahnihte hi nimin zing khan an inhmachhawn a, Davis awmna Los Angeles Lakers chuan New York Knicks lakah 128-112 in hnehna an chang.

Inkhelh boruakah player pahnih insawn tur hian sawi a hlawh; Madison Square Garden-a match an khelh bikah erawh LeBron James a langsar ber. James hian point 33 a neih bakah rebound vawi 11 lain a ṭhiante basket neih tur ṭum 12 a siamsak bawk.

ESPN tarlan dan chuan Dallas Mavericks star Luka Doncic chuan kum thum chhung atan Lakers a zawm dawn a, sum tam tak a hlawh dawn bakah a man atan Davis a kal tel dawn!

Team pahnih inrem dan chuan Mavericks hian Davis bakah guard Max Christie te an nei ang a, hei mai bakah hian 2029 first-round draft pick an nei thei dawn bawk a ni - season hmasa NBA final thlenpuitu Luka Doncic chuan nghawng a nei na dawn takzet.

Slovenian tlangval Doncic hian kum 2018 khan Atlanta Hawks aṭangin Mavericks hi a zawm a, chawhrualin match tinah point 28.1, rebound 8.3 leh assist 7.8 a nei phak a, tun hnai season nga chhung chu NBA All-Star zingah telin, season liam ta khan a team hi final a hruai thleng.

Donic an neih chuan James nen an inkawp dawn tihna a ni a, kum 40 mi ni tawh mah se Lakers tan a la ṭangkai reng. Lakers coach JJ Redick chuan, "James hian tih tur hmachhawp a la nei, chumi hlen chhuak tur chuan theihtawp a la chhuah reng," a ti.

Inkhel dangah Western Conference hmahruaitu Oklahoma City Thunder an chak - Thunder tan hian Aaron Wiggins chuan NBA a khelh china a point neih tam ber ṭum ni turin point 41 a nei, an khingpui Sacramento Kings chu 144-110 in an hneh.

NBA Most Valuable Player (MVP) Nikola Jokic pawhin a team a chakpui. Jokic hian point 28 a neih bakah rebound vawi 13 lain assist vawi 17 a nei bawk a, a team Denver Nuggets chu Charlotte Hornets lakah 107-104 in a chakpui.