Kane hoin Bayern an chak hram

Hun tawp dawna goal hnih an chhuah avangin Bayern Munich chuan an goal khung sa an sut zawh tir teuh hle, mahse goal li lai an lo khung tawh avangin Holstein Kiel chu 4-3 in an hneh.

Allianz Arena-ah Jamal Musiala hmangin Bayern Munich lamin goal khung an ṭan, striker ṭha Harray Kane chuan goal hnih belhin Arsenal froward hlui Serge Gnabry-a goal kan hmu zui bawk, 4-0 a hma an hruai avangin an dinhmun a him hlea ngaih a ni.

Mahse, Inrinni zan Bundesliga inkhelah Holstein Kiel hi an tlawm duh ngawt lo - Finn Porath chuan Bavarians goalkeeper Manuel Neuer dan theih loha khungin beiseina an insiam a, goal dang erawh kan hmu zui mai lo.

Hun tawp dawnah Steven Skrzybski chuan goal hnih khungin Bayern Munich thinphu a ti rang leh hnuhnawh a, phur thar viau mah se hunin a daih tawh lo, chak phu zawk Vincent Kompany leh a nauten point thum an hlawh chhuak.

Bundesliga goal 55 khung tawhtu Kane chungchang sawiin Kompany chuan, "A theihna leh thiamna hi chu sawi nawn a ngai lo, a thiam ang bawkin a rilru hi a nghetin a puitling bawk, goal a khung lohna inkhelah pawh a chiai ngai lem lo.

"Goal kan khung hma bakah kan khung tam avangin a lawmawm. Amaherawhchu, a tawp lam minute 10 chhung vel kan khelh dan kha chu a ṭha tawk lo, hei chu kei leh ka nauten kan sawi ho a ngai ang, kan khelh dan phung kan hloh a nih chuan midang tan hun kan siamsak tihna a ni," a ti.

Bayern Munich hi Bundesliga champion chiang ang maia sawi an ni ṭhin, mahse season hmasa khan Xabi Alonso enkawl Bayer Leverkusen an tluk lo - tun season kal laiah pawh team pahnih hi an inum chho leh mek, squad chhah zawk Bayern pawh an inthlahdah a remchang bik lo.

Leverkusen hian an chunga awm Bayern hi point kuain an phak lo mek, mahse nizan khan match khata an khelh tlem zawkna an khel a, an khingpui Hoffenheim an hneh a nih chuan an inkar hi an sawr zim thei dawn a ni.