Keeper thar nen AFC-in Sreenidi hmachhawn dawn

Aizawl FC-in goalkeeper Rafique Ali Sardar an lakluh thu an puang a, Mizo club hian zanin dar 7:00 hian Hyderabad-ah Sreenidi Deccan an hmachhawn dawn. Tun season I League-ah team hnih an relegate dawn a, Mizo club hian relegate loh tumin ṭan an khawh mek.

Goalkeeper buaina

Aizawl FC-in goalkeeper Vanlalhriatpuia hoin MPL-ah an champion a, Kawnpui tlangval hoin I League-ah match thum an khel a, goal a chhuah lo. Mahse, Gokulam an hmachhawn ṭumin Hriatpuia hi a inliam a, Aizawl FC goalkeeper buaina a inṭan.

I League boruak sangah Joel B. Lalramchhana'n inrintawkna a nei tawk lo a, Lalhruaitluanga pawhin mawhphurhna a la thei bik lo. Thlasik bazarah John Lalruatfela an lalut a, Dinthar tlangval pawhin beisei a pha bik lo.

Mizo club-in I League a inham tang turin tlarhnung thuam chak a ngai tih an hria a, goalkeeper tawnhriat nei ṭha zawk Rafique Ali Sardar an lalut. Kum 26 mi Sardar hi East Bengal, Mohammedan leh Rajasthan United tan te a khel tawh a, rinrawl ni pha ṭhin lo mah se Mizo club mamawh chhannaah an ngai.

Aizawl FC coach Victor Lalbiakmawia chuan, "Registration kan la ti fel lo a, kan tih fel phawt a ngai. Hei bakah hian training-naa a chet dan kan thlir dawn a, bul a ṭan nghal dawn em tih ka sawi thei lo," tiin Vanglaini a hrilh thung.

Dinhmun hre chiang

Aizawl FC-in tun season-a an tum ber chu 'relegate loh' a ni tawh a, chumi mil chuan inkhelh hmabak pawh an hmachhawn a ṭul. Zanina an hmachhawn tur Sreenidi Deccan hi Aizawla an hmachhawn ṭum khan 3-0 ngawtin hma an hruai hman a, mah se hun a tawp meuh chuan 4-3 in an chak lo.

Mizo club hian an lama hattrick siamtu David Castañeda Munoz ven dan an hriat chhuah a ṭul a, Colombian striker-in goal a khung theih nana ball ṭha zet zet vawrhluttu Panamanian winger Ángel Orelien ven uluk a ṭul dawn bawk ang.

Aizawl FC coach Victor chuan, "Kan dinhmun kan hrechiang tawh a, match zawng zawnga chak vek tum hi a finthlak loh. Kan tumpui a zirin point khat hlawhchhuahna tur pawh kan thlan thiam a ngai a, Sreenidi hi point khat tal kan hmuna tur team an ni," tiin a sawi a, goal venhim an ngai pawimawh dawn.

Sreenidi-ah hian Mizo paruk Lalromawia, B. Lalnuntluanga, R. Lalbiakliana, Brandon VL Remdika, C. Lalchungnunga leh Lawmnasangzuala te an awm a, Hyderabad club-ah hian Mizo player-ten hmun pawimawh an chang.