Forest leh Wood an kal zel

Premier League kai ther Nottingham Forest hi tunah chuan season thara Champions League khelh beisei ngam zinga mi an ni ta! Inrinni zan khan Chris Wood-a'n hattrick hmangin Brighton & Hove Albion chu 7-0 in an sawp.

An match hmasa zawkah Bournemouth lakah si nga faiin an chak lo a, nikum December thla tir hnua an tlawm lehna hmasa a ni - an match dawt lehah an insiamṭha nghal a, English football inelna sang bera an chak chian ber ṭum an tawng.

Nuno Espirito Santo-a naute hian minute 12-naah an goal hmasa ber an khung ṭan, a khungtu erawh Lewis Dunk niin Morgan Gibbs-White-a cross chu anmahni lamah a ti lut; Gibbs-White hian a hnuah a tauh lut bawk.

Forest lamin inkhel an thunun zui a, striker Wood chuan a zawnin goal thum a khung - an la duhtawk mai lo. Hun tawp dawnah Neco Williams leh Jota Silva ten an khung belh bawk a, mikhual lakah ṭhat an chhuah duh lo chiang hle.

Nottingham Forest lamin an chak chian ber ṭum an tawng a, point 47 hmuin Premier League table-ah pathumna an ni chhunzawm. Hetih lai hian Brighton erawhin kum 67 chhunga an chak loh chian ber ṭum an tawng thung.

Nuno Espírito Santo chuan, "Hetiang baka ṭha leh duhthusam hi chu beisei ngaihna pawh ka hre lo, kan chak loh hnu lawka ka naute rawn thawh chhuah leh dan hi duhthusam chu a ni," tiin a naute khelh danah a lungawi hle.

Forest-in season duhawm an hman theih nan hian striker Wood a pawimawh hle, New Zealand international hian tun season EPL match 24 a khelh aṭangin goal 17 a khung der tawh - Brighton an hmachhawn ṭum bikah hian Anthony Elanga chuan a ṭhiante khung tur vawi thum a siamsak bawk a ni.