Premier League club lian panga te hmabak Arsenal, Chelsea, Liverpool, Man City, Man Utd

Premier League season tawp rualin transfer titi-in min tuam nghal a, season thara chet ṭhat ngei tumin Premier League club-te an bazar nghal bawk.

Arsenal

Keeper zawnga rei tak buai tawh Arsenal-in Chelsea veteran keeper Petr Cech an lalut a, Thibaut Courois awm hnua Stamford Bridge-a hmun lailum chang pha meuh tawh lo Cech hi keeper ṭha tak a la nih avangin Arsenal hian an tisualin a rinawm loh.

Arsenal hian Sporting Lisbon midfielder pound mak­taduai 28.5 man William Carvalho leh Juventus midfielder Arturo Vidal te chu an midfield ti chak turin an rim mek bawk.

Striker hriam mamawh Arsenal hi Karim Benzema leh Zlatan Ibrahimovic te nen sawi zawm an ni bawk a, anni pahnih la lut tur chuan an hlawh lama insen hnem an huam a ngai ngeiin a rinawm.

Chelsea

Season hman zawh taka Premier League champion-in an mamawh tawh loh nia an hriat player-te an thianfai mek zel a, Didier Drogba leh an veteran keeper Petr Cech te an chhuah zalen.

London club hian transfer bazar lamah thawm an la nei lian lutuk lo.

Defender zingah Real Madrid central defender Raphael Varane leh Everton rawl­thar John Stones te an rim nia sawi a ni a, beisei ang erawh chuan an la inhnaih lo hle.

Cech thlak turin Stoke City keeper Asmir Begovic an rim nia sawi a ni a, midfielder zingah Zenit St Petersburg tana khel mek Axel Witsel leh Barcelona player Alex Song te hming lam rik a ni.

Tun dinhmuna Chelsea-in thawm an neih nat berna erawh Old Trafford lama beisei phak lo Monaco striker Radamel Falcao a ni.

Liverpool

Season hmasa a beisei phak lo Liverpool-in an captain Steven Gerrard an thlah liam a, Stevie G thlaktu tur hian Inter Milan midfielder duhawm Mateo Kovacic chu ngawrh takin an rim mek nia sawi a ni.

Pound maktaduai 29-a Roberto Firmino lei tawhtu Reds hian an mamawh dang chu striker hriam leh goal khung thei a ni. Rodgers-a'n transfer bazar inhawn rualin Aston Villa striker Christian Benteke a rim a, mahse a man zat atana an chhiar pound maktaduai 32.5 erawh to a ti deuh.

Liverpool hian Sevilla striker Carlos Bacca leh Zenit hmatawng Salomon Rondon te an rim mek nia sawi a ni bawk.

Reds-in Firmino bakah keeper Bogdan, winger James Milner, striker Danny Ings leh defender Joe Gomez te an la lut tawh a, central defender-a Martin Skrtel kawppui tur ṭha tak an la mamawh niin a lang.

Manchester City

Club chairman Khaldoon Al Mubarak-a'n squad ṭha tawk tak, an la thlen phak ngai loh thlenpui theitu tur din an tum thu a sawi a, Champions League nomawi chawi a duh thu a sawina a ni thei.

Manchester City player zingah James Milner a chhuak tawh a, Raheem Sterling an rim mek thung. Liverpool winger hi City hian lak luh an tum hle a, pound maktaduai 25 leh 35-a an dawrna Anfield lamin an hnar sak hnuah Liverpool chhiarna zat pound maktaduai 50 vela dawr an tum leh nia sawi a ni.

City hian Juventus player ṭangkai Paul Pogba lak luh tumin an bei nia sawi a ni bawk a, pawisa lamah buai lo mah se player zawng zawng deuh thaw khelh châkna Barcelona leh Real Madrid-in an rim ve miau avangin an dinhmun a ṭha lutuk lo.

Wolfsburg chhuanvawr Kevin de Bruyne chu City hian an rim mek nia sawi a ni bawk a, an tum tak tak a nih chuan lak luh a harsain a rinawm loh.

Manchester United

Season hmasa nipui transfer-a pawisa hmang nasa tak United-in thawm an nei lian a, an player duh zingah Real Madrid defender Sergio Ramos leh Spurs striker Harry Kane te chu an thlithlai ngun pawl nia sawi a ni.

Louis van Gaal-a'n English striker Kane-a tan pound maktaduai 40 thehchhuah a huam nia sawi a ni a, mah se amah berin Spurs-a a la hlim rih thu a sawi miau avangin lakluh a hautak maithei.

United keeper De Gea-a'n Real Madrid pan a duh nia sawi a ni a, Santiago Bernabeu lam pawn thawm an nei na hle. United hian De Gea an hralh a nih chuan Sergio Ramos lak luh an inbeisei thung a, Real-in an defender chhuanvawr hi hralh an tum lo thung.

Bazar nana pound maktaduai 150 nei LVG hian Bastian Schweinsteiger, Southampton France international Morgan Schneiderlin leh Spurs keeper Hugo Lloris te a rim mek bawk.