Quarterfinal paltlang tum tu Wozniacki

World number 5 Caroline Wozniacki chuan karleh aṭanga khelh tur Wimbledon-ah chuan a hniam berah quarterfinal thlen ngei a tum thu a sawi.

Denmark tennis star hian kum 2009 leh 2014 khan US Open final a lo khel ve tawh a, mahse a chak lo zawkah a ṭang. Grand Slam-ah hian a vannei lo ṭhin hle a, kum 2009, 2010, 2011, 2014 te khan Wimbledon-ah hian fourth round a inhlangkai vek a, amaherawhchu last eight thleng loin a tla zel. Kuminah erawh he a record duhawm lo tak hi thai reh ngei a tum ruh hle.

A inrintawk thu sawiin kum 24-a upa Wozniacki chuan, "Grass-ah hian ka khel chhe ngai hran bik pawh a ni lo, quarterfinal ka thleng lo tlat ṭhin hi a pawi a, kuminah chuan kal pelh ngei ka tum tawh ang. Final hial pawh thleng turin ka ṭha ve tawk chuan ka hria. Vawi khat ka paltlang chho a nih chuan nakin zelah pawh ka tan a awlsam phah tawh ngei ka beisei," tiin a sawi.

Thawhlehni khan Wozniacki hian Wimbledon inbuatsaihna tournament Aegon International championship second round-ah a khingpui Jarmila Gajdosova chu 7-6 (4), 6-2 in a hneh.

Danish professional tennis player hi kum 2010 khan chawlhkar 67 chhung chu World number 1 a lo ni tawh nghe nghe.