Leverkusen lakah Atletico an 'comeback'

Tun hnaiah La Liga hmahruaitu an nihna hloh mah se, Atletico Madrid-in a tikimtu mai nih an tum lo - Thawhlehni zan khan Bayer Leverkusen lakah goal chhuah hmasain, minute 65 kim loin khel mah se an 'comeback'.

Atletico khelmual, Metropolitano Stadium-a kan hmuh hmasak ber chu 'red card' a ni. Minute 25-naah Atletico midfielder Pablo Barrios chu Nordi Mukiele laka a chet dan hlauhawm tak avangin hnawhchhuah a ni.

Italian referee Davide Massa chuan a tirah yellow card a pe zet a, mah se, video assistant referee a inrawlh hnuah thil thlen dan a ennawn a, kum 21 mi midfielder hi a hnawt chhuak.

German club-in tam zawk an nih chhawr zuiin, Piero Hincapie chuan Mukiele-a siamsak chu hmahruaina goal ni turin a tauh lut - first half hun pek belh a ni a, Atletico-in si phur chungin chawlhlawk an hmang.

Mahse, chawlhlawk hman hnuah Atletico an insiamṭha a, a tlem zawk an nih a hriat loh! Minute 53-naah Antoine Griezmann-a ball thlawh luh chu Alvarez-a'n ṭha zetin a um lut a, German club si ban nghaktu Matej Kovar tana dan rual lohin a khung.

Leverkusen an talbuai zui a, Atletico an phur tulh tulh - Alvarez laka foul Florian Wirtz-a'n yellow card a hmuh belh lo chu a vannei tih loh rual a ni lo a, goal hmahruai khungtu Hincapie erawh a vannei ve lo.

Giuliano Simeone laka a foul avangin a yellow card pahnihna a hmu a, minute 76-naah hnawhchhuah niin, player 10 ve vein an khel - minute 90-naah Atletico tan Alvarez-a'n chakna goal a khung zui a, table-ah pathumna ni zuiin, top 8 ni turin an tan chance a ṭha ta hle.

Manchester City aṭanga Atletico pantu Alvarez-a'n a rintlakzia a pholang zel - tun season-ah Atletico tan inelna hrang hrangah match 31 khelin goal 16 a khung der tawh a, assist vawi hnih a nei bawk.