United-a Zlatan-a hun a inṭan

Manchester United-in Juan Mata, Wayne Roo-ney leh Zlatan Ibra-himovic te hmangin AFC Bournemouth lamah goal thum an khung a, Jose Mourinho hnuaia Premier League match hmasa berah point thum an hlawh chhuak nghal.

Pathianni zan inkhel-ah khawvel player manto ber Paul Pogba chu hrem vangin a inlan thei lo a, United player thar pahnih Ibrahimovic leh Eric Bailly ten inkhel bul an
ṭan. Borussia Dortmund aṭanga lakluh Henrikh Mkhitaryan-a'n minute 75-naah Spanish midfielder Mata thlakin Community Shield angin sawi zui a hlawh tawh lo. Dean Court-a inkhelah hian United hi 3-1 in an chak a, Adam Smith-a'n Cherries tan goal khat a khung ve bawk.

Zlatanera

Zlatan hian Premier League, Serie A, La Liga, Ligue 1 leh Champions League-a a match hmasa berah goal a khung vek.

Mourinho chuan, "Kan team tan leh Premier League tan Zlatan hi a hlu a ni. Chaw eina hmunah pawh player naupang zawk Luke Shaw leh Marcus Rashford-te'n an ṭhut pui a, tawnhriat nei tlem zawk player-te tan amahah hian zir tham a awm. Kum 34 a ni tih hi chu theihngilh a ṭha, a rilru put hmang hi kum 34 a ni lo - a vanglai angin a la khel thei a ni," tiin veteran player a a fak.

Yard 25 aṭanga goal khungtu Ibrahimovic chuan, "Kan tum hmasak ber chu chak a ni. Goal khung chu a lawmna belhchhahtu chauh a ni a, kan chak a nih phawt chuan goal khungtu lam a pawimawh lo," tiin amah aia team a dah pawimawh thu a sawi.

Swedish Language Council chuan Zlatan Ibrahimovic-a hming-chawi hian 'Zlatanera' tih chu Sweden dictionary-ah an lo telh tawh a, a awmzia chu 'thunun' emaw 'hneh' tihna niin Sweden-ah chuan ṭawng^-kam tlanglawn a ni der tawh!

Sweden striker hian Community Shield-ah Manchester United chakna goal a khung a, Premier League-a a vawi khat inlannaah goal a khung leh bawk avangin Zlatan-a hun a inṭan a tih theih a, match khat lek an la khelh avangin fak hluai tur erawh a la ni lo.

Rooney leh Mata

Wayne Rooney-a'n tun hma a pha tawh lo tih lang mah se goal a la khung. Premier League
ṭan niah United captain hian goal sarih a khung ta a, amah aia khung tam chu Alan Shearer leh Frank Lampard (8) te an ni.

Community Shield-a substitute aṭanga lut Mata chu hun tawp hmain thlak a ni leh a, Chelsea aṭanga Mourinho-a'n a hralhchhuah tawh bawk avangin Spanish midfielder hi chhuak tura sawi zui nghal a ni.

Premier League ṭan niah Mata-a'n goal a khung a, Cherries defender tih-sual vanga khung ni mah se Mourinho hnuaia league-a goal khung hmasa ber a nih avangin a hma lam hun a hril thei tlat.

Mourinho thu leh hla

Premier League ṭan niah Mourinho hian chak loh a la tawng lo. Portuguese manager chuan, "August thlaah chuan kar khatah match khat chauh a awm avangin thlan lohte hi an hnual ṭhin. September aṭang chuan League Cup, Europa League, Premier League bakah player ṭhenkhat ram tan an inlan ang a, chumi hunah chuan player zawng zawng tan hmun a awm ang. Hei vang tak hian squad chhah ṭha tak kan neih hi a ngai reng a ni," tiin Pogba awm hunah pawh Rooney leh Mata tan hmun a awm tur thu a sawi.