Kvaratskhelia-a'n Napoli chhuahsan a duh

Napoli forward Khvicha Kvaratskhelia chuan Serie A club hi chhuahsan a duh a, Italian club coach Antonio Conte chuan kum 23 mi winger hian chhuah a dil thu a sawi chhuak - Paris-St Germain a zawm ngei dawn niin a lang.

Conte chuan, "Kvaratskhelia hian club chhuahsan min dil a, kan inbiaknaah club chhuahsan a tum thu hi min hrilh a ni. Thil kalphung pangngaiah chuan a contract neih lai pawhsei tur a awm a, mahse, keimah ber hian player emaw, club emaw pawh contract chungchangah hian ka nawr na tawk lo a ni.

"Tunah chuan kei chu ka inthiar fihlim dawn a, kan club tana khelh duh loh player chu chelh reng ka tum lo a ni," a ti a, Georgia international hi Liverpool leh Chelsea nen pawh sawizawm a lo ni tawh.

Napoli ṭantuten club legend leh player ropui bik Diego Maradona hming chawia 'Kvaradona' hming lem an pek hian Napoli hi 2022-23 season-ah khan Serie A nomawi a chawipui a, player langsar a ni.

Kvaradona hian an champion season-ah khan Napoli tan inelna hrang hrangah match 43 khelin goal 14 a khung a, assist vawi 17 a nei. Season hmasa khan match 45 khela goal 11 khungin assist vawi kua a nei a, tun season-ah match 19 khela goal nga khungin, assist vawi thum a nei.

Fabrizio Romano tarlan dan chuan Kvaratskhelia hian PSG chu zawm turin inremna a neihpui tawh a, French club hian kum nga atan contract ziahpuiin, Georgia international-in a thil phutte chu tihhlawhtlin vek an tiam.

Napoli hian Georgian club Dinamo Batumi aṭanga euro maktaduai 10 vel leka an lakluh hi €80mtd-in an hralh dawn niin an sawi a, Napoli-ah hian kum khatah €1.2mtd vel hlawh mekin, PSG-ah hian kum khatah €8mtd a hlawh dawn thung - he thuziak i chhiar meuh chuan an inla lut fel tawh hial mai thei.