Chelsea-in Bayern winger Tel an ngaihven

Premier League club Chelsea chuan Bayern Munich winger Mathys Tel chu lakluh tumin an ngaihven a, hetihlai hian German club hian Blues forward Christopher Nkunku chu lakluh tumin an ngaihven ve bawk.

Chelsea hian nipui lai khan Tel hi lakluh tumin an lo ngaihven tawh a, German club hi thlasik transfer-ah dawr nawnin, kum 19 mi forward chu chhuah an phal a nih chuan dawr tura an inpeih thu an sawi.

Tel hian Allianz Arena-ah kum 2029 thleng khel turin contract a nei mek a, Stamford Bridge hi pan a duh kher ang em, tih pawh zawhna awm thei a ni. Hetihrual hian Bayern-ah coach Vincent Kompany rin a hlawh tawk lo a, tun season-ah league match hnih chiah bul a la ṭan a ni.

France Under-21 international hian tun season inelna hrang hrangah match 12 chauh a la khel a, minute 351 bak khelmualah hun a la hmang lo - goal leh assist tun season-ah a la nei miah lo.

Season hmasaah erawh player pawimawh zingah a tel phak a, tun season inelna hrang hrangah match 41 khelin goal 10 a khung a, assist vawi ruk a nei bawk.

Chelsea hian Bayern-in Nkunku an duh tih hre mah se, Tel lakluh tuma hma an lakna kawngah French striker hi an telh lo. Kum 2023-a pound maktaduai 50-a RB Leipzig aṭanga Blues pantu hian Bayern pan a hreh lo niin an sawi.

London club hian thlasik transfer-ah player lakluh tumin thawm an nei deuh reng. Crystal Palace centre back Marc Guehi pawhin an mit a la viau nia sawi a ni a, hetihali hian Ben Chilwell, Carney Chukwuemeka leh Cesare Casadei te chu tun thla chhunga Chelsea an chhuahsan phalsak an ni.