Alcaraz tan hna a awlsam

Inbuatsaihna tournament khel hmasa loin Carlos Alcaraz chuan Australian Open a khel, a match hmasa berah a buai chuang lo - Spanish star hian Alexander Shevchenko chu 6-1, 7-5, 6-1 in a hneh.

Thawhṭanni zan khan Margaret Court Arena-ah Alcaraz hi a inlan a, rinlawk ang ngeiin inkhel a thunun hneh hle - darkar khat leh minute 54 chhung lekin hnehna a chang thei a, tihsual chu nei ve nual bawk mah se a tan buaina tur a awm lo.

Alcaraz a chak

Grand Slam inelna hi chu a rei bik a, chawlhkar hnih chhung khelh a nih avangin tournament tir lama thahrui hman tam loh a pawimawh. Alcaraz tan darkar hnih pawh tling loa chak theih hi player dang pawhin an duhthusam a ni ang.

Kum 21 mi Alcaraz chuan, "Kumin atana match ka khelh hmasak ber a ni a, kei ngei pawhin engtianga harsa leh hautak nge a nih dawn ka hre lawk lo. Inkhel tawp lamah erawh a tir lam angin ka rilru zawng zawng ka pe lo deuh.

"Match lehpekah chuan tun aia ṭha zual zawkin ka khelh a ngai dawn, mahni service hum a pawimawh dawn a, tun ṭumah pawh khan service hloh ka neih avangin hmasawn ka ngai hle tih a chiang," a ti a, a khelh danah hmasawn a ngai tih a hria.

Alcaraz hi a kum la naupang mah se tawnhriat a nei tam tawh - Grand Slam nomawi pali ngawt a kawl khawm tawh, season hmasa khan French Open leh Wimbledon title a la, a la champion ngai lohna Australian Open-ah hian hlawhtlin a tum dawn a ni.

Medvedev tlang

Inelna tir lamah beisei loh result kan hmu nual ṭhin, champion tura rinkai zinga mi Daniil Medvedev pawhin fiahna hautak a hmachhawn nghal - Russian star hian set nga an khelh hnuah Kasidit Samrej chu harsa takin a hneh hram.

Rod Laver Arena-ah nimin khan Medvedev hi a inlan, a khingpui Thai tlangval Samrej hi wildcard hmanga inlan phak ve chauh a ni, harsa vak loa paltlang theih tur niin a lang, mahse 6-2, 4-6, 3-6, 6-1, 6-2 in a hneh hram a, a tan kawng awlsam a ni bik lo.

Seeded pangana Medvedev chuan, "Set hnihna leh set thumna bikah phei kha chuan ball ka vaw fuh ve thei miah lo emawni tih mai tur a ni. Kasidit Samrej kha player ṭha tak a ni, tun anga a khelh zel chuan sang tak a thleng thei ang," a ti.

Thai player zingah chuan Danai Udomchoke (2012 Australian Open) hnuah Samrej hi Grand Slam khel leh thei hmasa ber a ni a, a duh ang result hmu lo mah se player ṭha bik laka a chet dan avang hian hriatreng a hlawh zui tawh ang.