Match hmasa berah Raducanu a chak

Emma Raducanu chuan nimin khan Australian Open 2025 atana a match hmasa ber a khel a, a khingpui Ekaterina Alexandrova hnehin second round a inhlangkai.

Melbourne Park-a inkhelah Raducanu hi seeded ni phak lo a ni, a khingpui Alexandrova erawh seeded 26-na a ni thung; inkhel inhnehtawk takah Britain nula hian 7-6 (7-4), 7-6 (7-2) in hnehna a chang.

Raducanu hian kum 2021 khan khawvel barakhaihin US Open nomawi a chawi a, tennis khawvel chuan a lakah beiseina an nei sang zui nghal, mahse hliam neuh neuh vangin sulhnu ropui a nei chhunzawm thei rih lo.

Kum 22 mi Raducanu chuan, "Tihsual ka nei tam tih ka pawm a, chumi hliahkhuh leh tura ka beih let danah ka lawm," a ti a, second round-ah chuan tihsual neih tlem a pawimawh tih a sawi bawk.

First round inkhel dangah Naomi Osaka chuan Caroline Garcia lakah 6-3, 3-6, 6-3 in hnehna a chang. Osaka hian tun hnai khan a fa neihna rapper Cordae-a nen an inṭhen thu a sawi a, a bialpa nen an inṭhen hnuah tournament khel lehin a buai phah lem lo.

Chak tura rinkai zinga mi Elena Rybakina pawhin tualchhung nula Emerson Jones lakah 6-1, 6-1 in hnehna a chang - seeded parukna Elena Rybakina hian a match lehpekah chuan American mi Iva Jovic a tum leh ang.