Set hloh mah se Djokovic a chak

Australian Open a nih tawh chuan rilruah Novak Djokovic a lo lang nghal ṭhin - Serbian legend hian nimin tlai khan a match hmasa ber a khel a, a khingpui Nishesh Basavareddy lakah set hmasa ber hloh mah se a tho chhuak.

Rod Laver Arena-a inkhelah, Australian Open vawi 10 champion tawh Djokovic hian darkar hnih leh minute 59 chhungin 4-6, 6-3,6-4, 6-2 in hnehna a chang a, fiahna hmasa chu a paltlang phawt a ni.

Grand Slam vawi 24 champion tawh Djokovic hian season hmasa khan major title a la miah lo! Tun season chu Andy Murray nen an thawkdun a, tawnhriat ngah Murry nen an inkawp hnua a match hmasa berah a chak.

Sinner a buai lo

Australian Open atan inbuatsaihna tournament a khel hran lo a, kumina a match hmasa ber chu nimin khan a khel ve chiah - Jannik Sinner a buai chung lo, champion lai hian Nicolas Jarry chu 7-6 (7-2), 7-6 (7-5), 6-1 in a hneh.

Season hmasa khan Sinner hian Australian Open leh US Open nomawi a chawi a, kuminah pawh rinkai a ni leh ang. Sinner chuan, "Kan inhnehtawk khawp mai, a bik takin set khatna kha chu tu zawk zawk pawh khan la thei kan ni," a ti.

Italian tlangval hian second round-ah chuan, tualchhung tlangval Tristan Schoolkate a hmachhawn leh ang. Sinner hian damdawi hman phal loh chungchangah thubuai ngaihtuah tur hmabak a nei mek a, harsatna kara result ṭha a nei hi a tan chanchin lawmawm a ni ang.

Tsitsipas a tla

Champion tura rinkai zinga mi a ni a, mahse nimin khan Stefanos Tsitsipas chu hneh nei loin a tla nghal. Greek tlangval hi a unaupa nen doubles khel tur an ni a, mahse singles match a ngaih pawimawh avangin doubles huangah a inlan duh lo.

Amaherawhchu, a beisei leh duh ang ngawtin a thleng ta chuang lo - seeded 11-na Tsitsipas hi Alex Michelsen lakah 7-5, 6-3, 2-6, 6-4 in a chak lo; Melbourne Park-ah hian kum 2023 khan final a lo lut tawh, kuminah beisei a phak lo hle.

Kum 26 mi Tsitsipas chuan, "Tournament ka hmachhawn tam ve tawh viau a, doubles match ka khelh duh loh vawi khatna a ni, hahchawlh duh vangin inkhel lo mah ila singles match lamah ka ṭhat phah ta chuang lo," tiin a hun tawn mak a tih thu a sawi.