Mizo tleirawlin bronze medal a la

Asmita Khelo India Women National Weightlifting Leaque Youth, Junior leh Senior neih laiah Cindy Lalparmawii chuan 76kg youth huangah bronze medal a chawi chhuak.

Inelna hi Brahmapur, Odisha-ah neih niin, snatch 54kg, clean & jerk 60kg, total-ah 114kg a chawi a; Vaishnavi (Haryana) leh Prativa Rani (Odisha) te a tluk lo a, a thlen chin erawh a sang hle tho a ni.

Cindy-i hian Asmita Khelo India East Zone, nikuma Bhubaneswar-a neih zawh takah khan youth huangah silver medal leh junior-ah bronze medal a lo la tawh bawk.

Cindy Lalparmawii hi Khelo India State Centre of Excellence (KISCE), Rajiv Gandhi Stadium, Mualpui Hostel-a awm niin coach Malsawma Khiangte (SYS) zirlai a ni.

Vawiin hian Zosangzuali chuan +81kg huangah a chawi ve leh thung ang. Mizoram team hi Malsawma Khiangte Coach (SYS), Bethlehem Veng leh Malsawmtluangi Masseuse (KISCE), Republic Vengthlang ten an hruai.

38th National Games Uttarakhand neih tur atan Mizo weightlifter pathum - Silvan Beihrothatlo (67kg), Lalruatfela (89kg) leh Lalchhanhimi (71kg) te chu an tling tawh bawk.