Mizoram vawi hnih an chak

Senior National Volleyball Championship khelh laiah Mizoram mipa team chuan pool match vawi li an khel tawh a, vawi hnih chakin ṭum hnih dang chu an chak lo thung.

Nilaini zan khan Mizoram hian Andaman chu 25-16, 25-13, 25-12 (3-0) in an sawp a, ni khat chhungin match hnih an khel. Nimin zing khan match khel zui lehin Delhi lakah set la hmasa mah se, 25-23, 21-25, 23-25, 25-27 (3-1) in an chak lo.

Volleyball Federation of India (VFI) buatsaih - Senior National Volleyball Championship hi Rajasthan chuan a thleng a, Mizoram an chakna match pahnih hi Indoor-a an khelhah niin, an chak lohna hi outdoor-ah a ni thung.

Nizan khan Mizoram hian Maharastra an hmachawn zui leh a, result kan hre hman lo. Pool F bika an match hnuhnung ber atan January 10, Zirtawpni zing dar 8:00 hian Chandigarh an hmachhawn leh dawn a ni.

Tournament-ah hian team 32 an inlan - Pool hrang hrangah ṭhenhran an ni. Mizoram hi Pool F-ah Pondicherry, Chandigarh, Maharashtra, Nagaland, Delhi leh Andaman te nen an awmkhawm a, an intum kual vek dawn a, a sang pahnih in round of 16 an inhlangkai ang.

Mizoram Volleyball Association (MVA) chuan a tirah player 12 an ko a, mimal leh chhungkaw harsatna vangin an zin chhuak kim thei lo.