Vawk lal len Liverpool an tlawm - a ngamtu Tottenham

Tun season inelna hrang hranga a vawi hnih nan Liverpool an tlawm - a hnehtu chu beisei phak lo Tottenham Hotspur an ni a, League Cup semifinal first leg-ah champion lai hi 1-0 in an hneh.

Spurs tan Lucas Bergvall chuan sawisel theih takin inkhela goal awmchhun a khung a, Liverpool an lawm lo takzet. Mahse, Liverpool-in goal-ah a pawm a, Reds an tlawm.

Second leg khelh tur a la nih avangin Liverpool tan beiseina erawh a la awm a, si khat chauh an phurh avangin Anfield-a London club lehthal hi an huphurh lo ang.

Liverpool hian Inrinni zanah FA Cup third round khelin Accrington Stanley an mikhual zui dawn a, Tottenham hian Pathianni zanah vek Tamworth an lenchilh dawn bawk.

A ṭha ber

Liverpool-in kartawp inkhelah team ṭha an hmachhawn dawn lo tih an chiang a, League Cup semifinal a nih tawh bawk avangin Arne Slot-a'n player ṭhenkhat siksawi mah se, a neih ṭhat a thawhchhuahpui.

Captain Virgil van Dijk leh Mohamed Salah ten bul an ṭan a, Alisson Becker, Alexis Mac Allister, Ryan Gravenberch leh Cody Gakpo te pawh bul ṭan zingah an tel a, chak an tum tih a lang.

Mahse, Liverpool-in beisei angin inkhel an thunun thei bik lo a, tlarhma hmuhnawm kha hmuh tur an awm lo a, Manchester United nena inhnehtawk hlim team hi an hnual em ni chu aw, tih mai turin an khel.

Spurs tan Pedro Porro chuan goal khung theihna chance a hlah a, Dominic Solanke pawhin a club hlui lakah goal a khungah inngai mah se, offside vangin pawmsak a ni lo - video assistant referee (VAR) a rawn hnuah referee Stuart Attwell chuan thutlukna hi a siam a, a thutlukna hi microphone hmanga puangin, England-a VAR hmanga thutlukna, au rinna hmanga puan a nih hmasak ber a ni.

A hunah Spurs

Team pahnihin goal khung loin minute 90 an hmangral mai dawn niin a lang hman a, mahse, hun tawp nan minute li chiah a awm tawh tihah Spurs-in Reds an barakhaih.

Solanke siamsak chu Lucas Bergvall-a'n goal-ah a chantir a, mahse, Liverpool an lungawi lo. Kum 18 mi midfielder hi goal a khung hma hian Liverpool fullback Konstantinos Tsimikas lakah a foul.

Bergvall hi yellow card hmu tawh a ni a, referee-in ham ngat se, hnawhchhuah tur a ni a, ham ngei tur niin a lang bawk. Mahse, khelmual pawn lama Tsimikas a la awm lai ngeiin goal a khung a, referee-in a pawm.

Liverpool an thinrim takzet a, Dutch coach Slot meuh pawh a insum zo lo. Reds manager hi yellow card pek a ni hial a, hun tawp thlenga goal dang lut loin Spurs an chak.

Liverpool an bil

Slot-a'n player ṭha luhtir nual mah se, a beisei ang result a hawn lo a, an chance neih hlauhawm bera chhal ngam pawh substitute Trent Alexander-Arnold-a hun ṭha neih chu a ni - goal line aṭangin Radu Dragusin chuan a lo pet chhuak hman.

Reds tan bench aṭanga luhtir Darwin Nunez pawhin chance duhawm vawi engemaw zat a nei a, mahse, tun season-a goal khung harsat striker hian a team tan danglamna a thlen thei lo.

Spurs tan tun thlasik transfer-a lakluh, goalkeeper Antonin Kinsky a che ṭha takzet. Slavia Prague aṭanga pound maktaduai 12.5 senga an lakluh keeper hi London club-ah ni rei pawh a awm hmain bul ṭantir a ni a, a inringtawk tih a khelh danah a lang.

Goal khungtu Bergvall sawi hmaih a thiang lo. Nipui transfer-a Spurs-in £8.5mtd senga Djurgarden aṭanga an lakluh hian hma hun êng tak a nei tih a pholang a, Spurs tan player ṭangkai tak la ni turin theihna a nei.