Arsenal tan nomawi pakhat a bo phawt?

Player ṭha rual khel mah se Arsenal chuan an mikhual Newcastle United an hneh lo - Thawhlehni zan League Cup semifinal first leg inkhelah Gunners hi 2-0 in an tlawm.

Emirates Stadium-a inkhelah Magpies tan Alexander Isak leh Anthony Gordon ten goal khat ve ve an khung. February 5, Nilaini zan hian second leg khelh a ni leh dawn, a hmun chu St. James' Park a ni thung ang.

Arsenal an chuai

Arsene Wenger khan League Cup hi player naupang zawkte khelhna hun atan a hmang ṭhin - Mikel Arteta erawhin Newcastle United lakah sahuai a ser! Captain Martin Odegaard hoin Declan Rice leh Thomas Partey te an dingtlar.

Tlarhma pawh player khel thei an neih lai ho zinga a ṭha an ni a, striker Gabriel Jesus erawh bench lamah a awm hmasa. Jurrien Timber, William Saliba leh Gabriel ta kiangah Myles Lewis-Skelly a ding thung.

Mualneitu an ni a, a bul ṭan lamah pawh an hlauhawm - forward Gabriel Martinelli chuan chak taka ball tlanluh puiin, goalkeeper Martin Dubravka chauh hmachhawn tawh mah se goal ban a pet per.

Goal khung theihna ramchang an insiam zauh zauh a, mahse an hlawhtling thei lo. Chawlhlawk hmain Isak a inlar, awmna tur hmun dika a awm chhawrin hnai tak aṭangin a pet lut, keeper David Raya tan tih theih a awm lo.

Magpies an phur

Goal an neih hnuah Newcastle United an phur a, inrintawkna sang tak nen second half an khel. Isak-a shot ṭha tak chu keeper Raya-a'n lo dangper mah se, ball per hi Anthony Gordon chuan lo chang fuhin an goal hnihna a khung.

Goal hnih an phurh hnuah Arsenal lamin an nawr let na viau - Mahse, Kai Havertz chuan tauh luh theihna remchang a hmuh chu a hmangṭangkai lo, a luin a tauh fuh tlat lo! Bench aṭanga lut Jesus leh Jorginho te pawhin goal zawnah an pet thei lo.

Khualmualah Eddie Howe-a naute an chak a, final lut tur chuan minute 90 chhung anmahni goal venhim a tawk tawh ang, League Cup champion an beiseina a nung a, an hmabak erawh thil awlsam a ni kher lo ang - semifinal lehlamah Tottenham leh Liverpool an inkhel a ni.

Magpies hi English champion chi vawi li an ni tawh a, FA Cup pawh ṭum ruk an la tawh. Mahse, kum 1969 khan Fairs Cup an la a, a hnu lamah an la champion leh lo, nomawi chawi châkin an tuihal huam huam, an ban phak hnaivai ber chu League Cup hi a ni ang.

Nomawi a bo?

Arsenal tan League Cup final lut tur chuan hna a hautak tawh dawn hle, a tlem berah goal hnih tal an chhung a ngai dawn - beisei bo la ni lo mah se kawng a hautak dawn takzet. Premier League, FA Cup leh Champions League title an la beisei thei bawk.

Tun kar tawp hian Manchester United nen FA Cup third round an khel dawn, EPL erawh Liverpool chetsual an chan a ngai dawn - UCL chu tun hma aṭanga an la theih ngai loh a ni, theih loh ni lo mah se kawng awlsam a ni dawn lo.

Mikel Arteta-a'n champion a duh takzet a, player ṭha pawh a hmang nasa. Tun kar tawpa Man United nen an inkhelh hunah pawh chak tumin a naute a rem a rinawm, an chefuh a nih chuan nomawi beiseina a nung zel ang.

Chutihrualin, January thla chhungin match pakua an khel dawn a, vawi hnih an khelh tawhah chak ni hmel an la hmu lo. Thlasik vanglai hian an nomawi beisei ho a bo duak thei, khaw vawt karah chhel taka din tlang dan an ngaihtuah chhuah a ngai dawn a ni.