Australian Open 2025: Kum 37 mi Djokovic leh a beiseina chu...

Tennis season khat chhunga Grand Slam hmasa ber Australian Open 2025 chu January 12, Pathianni aṭang hian khelh ṭan a ni leh dawn ta, mipui ngaihven ber chu Novak Djokovic a ni ang.

Djokovic chauh a ni dawn lo, world number 1 Jannik Sinner leh Carlos Alcaraz te chu mipui ngaihven zinga mi an ni dawn a, inelna boruak sang leh hmuhnawm tak an chhawpchhuak leh dawn tih chu sawi ngam sa a ni.

Serbian star Djokovic hi kum 37 mi a ni mek a, kumin May thla mai hian kum 38 mi a ni tawh dawn - a vanglai a pel tawh a, chutihrualin Australian Open bikah chuan midang tana hmachhawn châkawm lo ber a la nih ngei ang.

Record a hnai

Novak Djokovic hian Grand Slam title 24 tehmeuh a la tawh, mipa player zingah chuan amah tluk tu an awm lo, a hnaih bertu Rafael Nadal chuan nomawi 22 a nei, ani hi a chawlh tawh - Novak dinhmun hi a sang hle.

Mahse, hmeichhe player zingah Margaret Court chuan title 24 tho a lo la ve tawh a, tunah hian Djokovic nen hian inelna liana champion tam lamah an intluk mek, ani pawh hian tennis a khel tawh lo.

Djokovic hian major title pakhat lek pawh a lak belh a nih chuan, mipa leh hmeichhe huanga Grand Slam champion tam ber nihna chu amah chauhin a chelh thei dawn, record thar siam theih chu a duhthusam a ni ngei ang.

Grand Slam vawi ruk lo champion tawh Stefan Edberg chuan, "Novak hi a upa deuh tawh a, a vanglai a pel tawh tih chu kan hre vek. Chutihrualin, major title la thei zingah dah bo a remchang lo.

"A nihna takah chuan Australian Open khelh turah hian rinkai a ni a, ama tan pawh Grand Slam dang zawng aiin hun ṭha a ni turah ka ngai," tiin a sawi a, champion turin a la ringtawk hle.

Murray nen thawkdun

Season hmasa mai khan Andy Murray chuan tennis a chawlhsan a, kum tawp lamah Novak Djokovic nen an thawhdun thu an puang zui, an thawhdunna hi Australian Open 2025 atan hian a ni ang.

Murray hian Djokovic hi training a neih pui tawh a, ani pawh hian Australian Open lo khel fo tawh leh final vawi tam tak lo khel tawh a nih avangin tawnhriat a nei ṭha, court chhung leh pawnah a ṭangkaipui ngeiin a rinawm.

Britain star Murray nen an thawhdun dawn khan Djokovic chuan, "Hma hun thui tak ka ngaihtuah a, hlawhtlinna chan zel ka la duh," tiin a lo sawi tawh a, player a nih laia world number 1 hlui lakah beisei a nei sang hle.

Murray leh Djokovic te chungchang sawiin Edberg chuan, "Anni pahnih inkawp hu khawvelin a hmu chak. A bik takin tennis player naupang zawkte tan entawn tur tam tak an hnutchhiah ngei pawh ka beisei, chutiang tur chuan midang pawhin an ring.

"Novak hi chuan midang cho phur leh nawr kal hi a thiam em em a, a dinhmun a hniam deuh emaw kan tih lai pawh hian huaisen takin a lo tho chhuak leh mai ṭhin," a ti. Djokovic hian tennis a khelh hun chhunga a nomawi 100-na tur a beisei mek bawk.

Sinner leh Alcaraz

Tennis season hmasa khan kum 23 mi Jannik Sinner leh kum 21 mi Carlos Alcaraz ten Grand Slam pali an insem vek! Italian tlangval Sinner-a'n Australian Open leh US Open nomawi a chawi a; Alcaraz hian French Open leh Wimbledon title a la thung.

Tun hnai kum 15 chhung vel kha chuan, Grand Slam a nih tawh chuan 'Big Four' zinga mi - Roger Federer, Rafael Nadal, Novak Djokovic leh Andy Murray kha champion tura rin an ni nghal mai ṭhin.

Mahse, he rindan leh thil lo thlen tawh dan hi Sinner leh Alcaraz hian an rawn ti danglam chho mek a, tun season lo awm turah pawh hian mipui ngaihven hlawh bik an ni ngei dawn a, an hna erawh a awlsam bik lo ang.

Spanish tlangval Alcaraz chuan, "Hlawhtlin zel duh mi ka ni a, Grand Slam pali ka lak kim lohna chu Australian Open chauh hi a ni tawh, chuvangin Melbourne Park-ah hian hlawhtlin ngei ka duh a ni," tiin a sawi.

Alcaraz hian season hmasa tawp dawnah khan, kum 2025 chhunga a thil tum lian tak chu Australian Open champion a nih thu a lo sawi tawh a, chumi tih hlawhtlin tum chuan kar leh aṭangin thapui a thawh ṭan dawn a ni a, a hmuhnawm khawp ang.