Zemabawk chungah Chhinga Veng

Cricket Association of Mizoram hnuaia I Division club pariatte inelna First Division One Day Tournament 2020 chu a hmawr bawk a hnai. Nimin khan group A chuan an league round khelh zawh nan an elpui Zemabawk Pitchers chu wicket nga (5) a hnehin final an lut.

Ramhlun Sports Complex-a inkhelah Chhinga Veng hian vawm hmasak an thlang. Zemabawk lamin over 48.4 chhungin run 175 an siam a, an thi kim. Chhinga Veng lamin an target hi over 43.5 chhungin an umphak a, mi panga chiah an in hloh.

Group A-ah hian Ramhlun Venglai, Durtlang, Zemabawk Pitchers leh Chhinga Veng te an awm a, vawi khat ṭheuh an inkhelh kual hnuah 3C hi a chung berah awmin final hi an lut.

Vawiin hian group B lamin league round an khel zo ve thung dawn. Pahnihna ni lai Gorkha leh Zarkawt Lords te an inhmachhawn ang, an group aṭang hian point ruk hmutu Chanmarians chu hmahruaitu an ni. Ruahman dan chuan final hi January 24, Zirtawpniah khelh tur a ni ang.