Borussia Dortmund-in last 16 an lut
Nilaini zan khan Borussia Dortmund leh Lazio 1-1 in an inhnehtawk a, German club hian Champions League last 16 an lut. Dortmund striker Erling Haaland chu inhliam vangin a inlan lo a, Norwegian striker hi kumin chhungin a inlan a rinawm ta lo.
Inkhel chu
Signal Iduna Park-ah Dortmund-in minute 44-naa Raphael Guerreiro goal hmangin hma an hruai a, Lazio-in minute 67-naa Ciro Immobile penalty hmangin an sut a, 1-1 in inkhel a tawp.
Group F inkhel dangah Club Brugge-in Zenit 3-0 in hneh a, knockout stage luh beiseina an nei bawk. Belgian club tan hian Charles De Ketelaere, Hans Vanaken leh Noa Lang ten an khung.
Dortmund an tlang
Borussia Dortmund-in an match hnuhnung berah tla tawh Zenit an hmachhawn dawn. Inkhel ngaihven tur zawk erawh Lazio leh Club Brugge inkhel a ni ang. Dortmund hian head to head-ah Club Brugge aia an ṭhat zawk avangin Belgian club hian point 10 rawn hmu ve pawh ni se last 16 an luhna a dal pha tawh lo.
Chutihrualin Brugge hian Lazio an hneh a nih chuan knockout stage an lut dawn a, Italian club dinhmun a la derthawng. Stadio Olimpico-a inkhel tur hi a pawimawh a, Lazio forward Immobile a dam tawh avangin Simone Inzaghi hote hi rinkai zawk an ni ang.
Haaland a inhliam
Borussia Dortmund chuan Nilaini khan striker Erling Haaland-a'n a malpuiah hliam a nei tih an puang. Haaland hian Champions League group match hnuhnung bera Zenit St Peterburg nen an inkhelh hunah a inlan thei dawn lo a, Bundesliga lamah Eintracht Frankfurt, VfB Stuttgart, Werder Bremen leh FC Union Berlin te a hmachhawn thei dawn lo.
Norway international Haaland hian tun season match 14-ah inlan tawhin Dortmund goal khung 37 zinga goal 17 a khung a, assist vawi thum a nei tawh bawk. Kum 20 mi Haaland hian kumin January thlaa Dortmund a zawm hnuah match 32 a inlan tawh a, goal 33 khung tawhin assist vawi ruk a nei tawh. Thla liam ta khan Italian chanchinbu Tuttosport chuan Europe-a best young player 2020 atan an thlang a, Golden Boy Award an hlan.
Dortmund striker hian kum 2024 thleng German club-ah contract a nei a, a release clause hi euro maktaduai 75 chauh niin an sawi bawk. Amaherawhchu kum 2022 hma chu a release clause hi hman theih a ni lo.