Krismas lawm nan Laipui a puak!

Arsenal chuan krismas hma Premier League an match hnuhnung berah laipui vawi nga ngawt an hmet puak, an mikhualna ramah Crystal Palace chu 5-1 a sawpin champion an beiseina an chhi nung.

Selhurst Park-a inkhelah Gabriel Jesus-a'n goal hnih a khung a, Brazilian striker bakah hian Kai Havertz, Gabriel Martinelli leh Declan Rice ten goal khat ṭheuh an khung, mualneitu lam goal neih chhun hi Ismaila Sarr khung a ni thung a, awmzia erawh a nei phak lo.

Laipui a puak

Goal khung thei player an neih ṭhat tawk loh avangin Arsenal an buai a, tunah chuan Jesus a dam chiang ta. Brazilian striker hian League Cup-ah hattrick a siam a, league-ah rin zui niin tlarhma laiah inkhel bul a ṭan.

Mual sir aṭanga Bukayo Saka-a cross chu Palace lamin an chingfel mai lo, a hmun dika awm Jesus chuan a pet lut. Mahse, Sarr chuan minute nga hnu lekah William Saliba dan theih lohin an si phurh a sut ve nghal.

Corner bawk chu buaina tham a ni, ball kang an tauh chhuah ṭhat tawk loh chu Thomas Partey-a'n pet nuam tur tawk chiahin Jesus a siamsak, ani hian goal kilah a khung, a duhna laiah tak a khung emawni tih mai tur a ni.

Hliam vangin Saka thlak a ngai a, an hlauhawmna erawh a nep phah chuang lo. A hnuah Havertz, Martinelli leh Rice ten an khung belh a, nuamsa taka chak erawh an ni bik lo - goalkeeper David Raya chuan an lama lut tur a dang nual.

Saka inhliam

Goal an khung tam avangin Arsenal an lawm a, point thum an hmuh avangin an lawm bawk. Mahse, an fapa duatlai Saka inhliam chu Mikel Arteta tan pawh ngaihtuahna tibuai tham a ni ngei ang, a dinhmun tak erawh a la chiang lo.

Khelmual sir lamah ball chang loa a awm laiin Saka hi a hliam, malpui hliam vang hian eng chena rei nge a chawlh dawn erawh sawi theih a la ni lo. Arteta chuan, "A malpui hnung lam a hliam a, a inkhel zui ve thei ta lo a ni.

"Uluk taka endik nghal a ni a, a chawlh rei zawng tur erawh ka sawi mai thei lo," a ti. Saka bakah hian Raheem Sterling a hliam tih a sawi bawk a, tlarhma ding lam sira khel thei tur an inchher chawp deuh a ngai dawn niin a lang.

England international Saka hi a dam a nih phawt chuan Arsenal rinrawl a ni, kum 2019 aṭang khan goal 52 a khung bakah a ṭhiante khung tur ṭum 44 a siamsak tawh, a hmun ruak hnawh khah chu a harsa dawn.