Blues tan Conference League a nem mah mah

An player neih ṭhat ho an hahchawlh tir chung pawhin Chelsea tan buaina tur a awm chuang lo - Blues hian Marc Guiu-a hattrick hmangin an mikhual Shamrock Rovers chu 5-1 in an sawp.

Chelsea hi last 16 lut chiang tawh an ni a, coach Enzo Maresca-a'n a sawi lawk ang ngeiin player naupang leh Premier League lama a chhawr rim lohte tan inkhelhna hun a siamsak a, buaina erawh an tawk chuang lo.

Stamford Bridge-a inkhelah Blues tan Marc Guiu-a'n goal thum a khung bakah Kiernan Dewsbury-Hall leh Marc Cucurella ten goal khat ve ve an khung. Irish club Shamrock Rovers tana Markus Poom tana goal khungin awmzia a nei phak lo a ni.

Blues manager Enzo Maresca chuan, "Tun inelna kan hmachhawn laiah Marc Guiu hian goal ruk a khung der tawh, goal a khung mai bakah hian a ṭhiante tan a khel ṭha ṭhin em em bawk a, team tan mi pawimawh tak a ni chiang hle.

"Player zawng zawng an khel ṭha vek, mi ṭhenkhat chuan inrintawkna nei turin inkhelh tam an mamawh, chutiang mite tan chuan Conference League hi a ṭangkai em em a ni," tiin a sawi a, knock out stage chinah erawh player ṭha an inlan tam tawh ang.

Premier League lamah pawh Chelsea hian result an nei ṭha ṭhin, pahnihna dinhmun luahtu an ni kek - Pathianni zan dar 7:30 hian league match khel turin Everton an lenchilh zui leh nghal dawn a ni.