Mayweather-a'n sum a hailut hnem

American boxer Floyd Mayweather-a'n sum a hnekchhuak hnem a, Forbes magazine-in thla 12 chhunga infiammi sum lalut hnem ber an tarlanah pakhatna a ni.

Forbes hian kumtin infiammi sum lalut hnemte an tichhuak ṭhin a, tuna infiammi te sum lakluh an chhut sak dan hi infiammi sum lalut hnem an tihchhuah hnuhnung ber nikum June thla aṭanga kumin June thla inkara infiammi te sum lakluh zat aṭangin a ni.

Mayweather hian thla sawm pahnih chhung lekin dollar maktaduai 300 a hlawhchhuak a, a hlawhchhuah tam zawk hi kumin May thlaa Man­ny Pacquiao nen an inhnek aṭanga a lakluh a ni.

Filipino boxer Pac­quiao pawn Mayweather nena an inhnek hi a hausak pui khawp mai. Thla sawm pahnih chhung khan dollar maktaduai 160 hlawhchhuakin footballer lar Cristiano Ronaldo ai pawn a lalut hnem zawk. Portuguese footballer hian dollar maktaduai 79.6 a pet chhuak a ni.

Khelmual chhunga Ronaldo elpui ber Lionel Messi-a'n khelmual pawn lamah Real Madrid chhuanvawr a phak lo. Barca thiampuipa hian dollar maktaduai 73.8 lalutin palina a ni.

Hmeichhe infiammi zingah top 20-a lang phak an awm lo. Russian tennis star chhelo Maria Sharapova-in hmeichhe infiammi zingah sum a lalut hnem ber a, dollar maktaduai 29.7 a lalut.

Forbes-in infiammi sum lalut hnem a tih­chhuah zingah hian Barcelona forward kum 23-a upa Neymar chu naupang ber niin 23 naah a awm a, thla sawmpahnih chhung lekin dollar maktaduai 31 a lalut.

Indian infiammi zingah India cricket captain Mahendra Singh Dhoni a lang a, IPL-a Chennai Super Kings captain leh Brazil captain Neymar-a te hian dollar maktaduai 31 ve ve an la lut a, 23-naah an awm.