East Bengal tan David-a'n goal a khung

Indian Super League-ah David Lalhlansanga'n goal a khung a, player of the match-ah thlan a ni bawk - Thawhlehni zan khan East Bengal chu Punjab FC lakah 4-2 in hnehna a chanpui a, Kolkata club hian an match hnuhnung paliah vawi thum hnehna an chang ta.

Kolkata khawpuia inkhelah Punjab FC an tlangnel hman viau a, Asmir Suljic leh Ezequiel Vidal-a goal hmangin, first half-ah 2-0 in hma an hruai a, Salt Lake Stadium-a inkhelah Punjab club hian hnehna an chang ngei dawn niin a lang hman.

Mahse, second half-ah East Bengal tak tak kan hmu a, an 'comeback' chiang hle. Second half ṭan aṭanga minute khatna lekah Hijazi Maher chuan si phurh sut nghalin, Vishnu Puthiya, Suresh Meitei (own goal) leh David Lalhlansanga ten goal khat ṭheuh an khung ve leh bawk a, 4-2 in an chak.

East Bengal tan hian goal khungtu David-a bakah, defender Lalchungnunga chuan inkhel bul a ṭan bawk a, Vairengte striker, bench lama a hun tam zawk hmang David-a'n a hun ṭha neih a bawhpelh lo chiang hle.

David hian East Bengal tan ISL-ah match sarih khel tawhin, goal hnih a khungna a ni - khelmualah hmun a chang tam tawk rih lo a, tun season ISL-a khelmuala a hun hman zat hi minute 177 chauh a ni a, minute 89 dana goal khung ang a ni phak daih.

Mohammedan SC aṭanga hming chher David hian tun season inelna hrang hrangah match 12 khel tawhin, goal li a khung tawh a, minute 90 khelh tluan a la nei miah lo - match rukah bench aṭangin a lut a, match ruk dangah lakchhuah a ni bawk.

Mizo tlangval hi minute 104 dan zela goal khung ang a ni phak a, a chhe lo hle. ISL-ah a vawi khat nan player of the match-ah thlan a ni bawk a, Vairengte tlangval tan chuan zan chhinchhiahtlak a ni.

Tun season ISL-ah match 73 khelh a ni tawh a, player of the match-ah hian David hma hian Lalremsanga Fanai, Isak Vanlalruatfela, Lallianzuala Chhangte, Lalchungnunga, Lalengmawia Ralte leh Jerry Lalrinzuala te thlan an lo ni tawh a, Odisha forward Isaka hi vawi hnih thlan a ni tawh.