Midang chunga leng Bonmati

Mipa chauh ni loin hmeichhe football pawhin ngaihven a hlawh a, hma a sawn ve zel bawk. Barcelona midfielder Aitana Bonmati chu a zawna a vawi hnih nan Best FIFA Women’s Player atan thlan a ni.

Kum 26 mi Bonmati hian club leh ram tan season a hmang ṭha. An ram Spain chu 2023 Women's World Cup champion a nih pui a, hemi ṭum hian player ṭha ber chawimawina Golden Ball Award chu hlan a ni.

Tun hnaiah chuan Bonmati hi mimala tluk thei an awm lo, kum 2023 leh 2024 khan Ballon d'Or a dawng bawk - heng kumah hian Barcelona chu Champions League nomawi a chawipui ve ve.

Bonmati chuan, "Mimal chawimawina ka dawng a ni mai a, a thawk chhuaktu erawh Barcelona leh Spain tana ka khelh puite zawng zawng nen kan ni thung," tiin a sawi.

Season hmasa khan Bonmati hian Barcelona tan nomawi chawi theih zawng zawng - Liga F, Champions League, Supercopa leh Copa de la Reina te a lakpui vek bawk.

Hmeichhe chawi-mawina dang Best FIFA Women’s Coach chu Emma Hayes hnenah hlan a ni. Chelsea manager hlui Hayes hian a zawna season nga chhung Blues a hlawhtlinpui hnuah United States team a enkawl a, nipui lai khan Paris Olympic-ah gold medal a hlawhchhuahpui a ni.