Alexis Sanchez-a'n Arsenal season hman dan a duh khawp lo

Arsenal forward Alexis Sanchez chuan season duhawm tak hmang zo hlim hlawh mah se hei aia ṭha zawka khel thei an nih thu leh season duhthusam a nih hran loh thu a sawi.

Season hmasa ṭan dawn khan Arsenal manager Arsene Wenger-a'n pound maktaduai 35 seng in Sanchez hi Barcelona aṭangin a lalut a, a tisual lo. A season khatnaah a club tan inelna hrang hrangah goal 25 lai a khung nghal. A zawna FA Cup an champion theih nan pawh Sanchez hian final-ah goal ropui a khung nghe nghe. A team te chu season thara Champions League khel thei turin a hruai thleng bawk.

Kawng ṭhenkhatah hlawhtlinna chang mah se English club lian tan season duhthusam a ni lem lo. Premier League-ah an elpui Chelsea chu point 12 laia an phak loh bakah France club Monaco chuan Champions League last 16 aṭangin an pet chhuak bawk. Hei mai bakah hian an khelmual Emirates stadium-ah Southampton hneh loin League Cup aṭangin an tla bawk.

An season hman zawh tak chung­chang sawiin Sanchez chuan, "Season ṭha tak chu kan hmang ngei mai. Amaherawhchu, kawng tam takah chuan duhthusam chu a ni chiah lo. Keini ang club lian tan chuan Champions League final khelh leh Premier League nomawi chawi hi a in awm viua in ka hria. Kan team-ah player ṭha tam tak leh tawn hriat nei ṭha an awm nual avangin hei aia season ṭha zawk hi hmang thei tur kan ni," tiin a season hman zawh tak chu ṭha thawkhat mah se duhthusam a nih loh thu a sawi.

Kum 26-a upa Sanchez hi Copa America khel turin Chile squad-ah a awm mek.