FIFA Intercontinental Cup final: Real Madrid-in Pachuca an hmachhawn dawn

Football khawvela thuneitu sang ber FIFA-in Club World Cup kalphung a thlak danglam avangin, kum tina khawmualpui inelnaa champion-te inelna tur tournament a ruahman a, a hmingah FIFA Intercontinental Cup an ti.

Zanin dar 10:30 hian he FIFA Intercontinental Cup final hi khelh a ni dawn a, European champion Real Madrid chuan CONCACAF champion Pachuca an hmachhawn dawn.

Club pahnih tan football khawvela thi tawh lo tur chanchin ziahna remchang a ni a, he inelnaa champion hmasa ber nih tum hian an thutak viau ang tih a chiang. Real coach Carlo Ancelotti pawhin a player neih ṭhat ber ber a thawhchhuahpui.

Spanish club Real leh Mexican club Pachuca inhmachhawnna tur hmun hi Lusail Stadium, Qatar a ni a, middle east-a mipui len tamna ber khelmual a ni - a hmunah mipui 88,966 tan inkhel hi en theih a ni dawn.

Tournament thar?

FIFA-in kum tina khawmualpui champion-ten an khelh ṭhin FIFA Club World Cup chu a kalphung tidanglamin, club 32 inelnaah a siam - kum li dana khelh tur a ni tawh dawn bawk a, nakkum hian USA-ah khelh a ni ang.

Hetiang a nih avang hian CWC kalpui ṭhin chu FIFA-in her danglamin, khawmualpui champion-te kum tina an inelna tur Intercontinental Cup hi buatsaih a ni ta a ni. Europe, Africa, North America, South America, Asia leh Oceania champion-te an inel.

Match hmasa ber hi African–Asian–Pacific Cup playoff tih niin, Asia champion Al Ain chuan 6-2 in Auckland City an hneh a, African–Asian–Pacific Cup-ah African champion Al Ahly nen intawng lehin, Ahly hi 3-0 a chakin Challenger Cup an lut.

Derby of the Americas tih chu lehlamah khelh niin, North America champion Pachuca-in 3-0 in South America champion Botafogo an hneh a, Challenger Cup-ah Al Ahly an hmachhawn zui - 0-0 a an inhnehtawk hnuin, penalty-ah 6-0 in Pachuca an chak a, final-ah European champion Real an hmachhawn dawn.

Champion tum Real

Real Madrid-in Intercontinental Cup-ah tih mai mai an tum lo a, an khel a nih chuan champion law law an duh - coach Carlo Ancelotti-a'n a neih ṭhat ber a thawhchhuahpui a, hliam damkawr Kylian Mbappe pawh a hruai!

Ani bakah hian Vinicius Jr, Jude Bellingham leh Rodrygo te pawh hruai an ni a, goalkeeper Thibaut Courtois chena an kal avangin Real hian champion an tum tih a chiang a, Pachuca lakah an ti mai mai lo ang.

Real hi tun hnaiah beisei dan thiam an harsa ṭhin a, an league match hnuhnung pathumah vawi khat chiah an chak. Barcelona tawlhthluk ṭhin avangin table chung ber luah theihna remchang pawh an nei ṭhin a, an bawhpelh leh ṭhin!

Zaninah player-te inrintawkna nei a, champion an ngam lehzual theih nan chak a ṭul a, Pachuca an hneh a, nomawi an chawi a nih ngat chuan team an phur thar ang - hei hi Ancelotti-a'n thlentir a duh dawn.

Pachuca hi

Mexican club Pachuca hi tun season-ah an ropui lo hle - 2024 CONCACAF Champions Cup nomawi chawitu team hi club 18 inelna Liga MX-ah 16-na an ni mek a, tun season-a league match 17 an khelh tawhah vawi thum chiah an la chak!

Mahse, Uruguayan coach ṭha Guillermo Almada enkawlna hnuaiah Pachuca hian rin loh takin FIFA Intercontinental Cup-ah hming an chher a, Real hmachhawn turin an kalkawngah South America leh African champion an hneh thei - European champion hneh leh ngat an châk dawn.

Chutihrual chuan tlarhmaah Salomón Rondón-a'n a theihna tak tak a pholan a ṭul dawn. West Brom striker hlui hian Pachuca tan tun season-ah match 18 khelin goal sarih a khung tawh a, Champions Cup nomawi an chawina kawngah top scorer a nih bakah Best Player a ni tel a, kum 35 mi striker tan Real laka nomawi chawi hi a tan duhthusam a ni ang.

Pachuca hian player langsar vuta sawi tur kawl nei lo mah se, Sevilla winger hlui Oussama Idrissi, Mexico full back ṭhangduang Bryan González, Celta Vigo centre back hlui Gustavo Cabral leh Mexico international ṭhin Luis Rodríguez te ho an kawl a, Real laka thilmak thlentir thei tur khawp chu an ni.