India champion puitu Rinpuii leh Tluangi

Hockey inelna Women's Junior Asia Cup 2024 khelh zawh takah India an champion. India tan hian Mizo tleirawl pahnih PC Lalrinpuii leh Lalthantluangi te chu an inlan a, an champion theih nan tha an thawh hlawk hle.

Pathianni zana final khelhah India leh China te hun pangngaiah 1-1 in an inhnehtawk, China tana Jinzhuang Tan-i khung chu Kanika Siwach chuan sutin goal dang a lut lo, penalty shootout neih niin India hi 3-2 in an chak ta a ni.

India rama hockey thuneitu sang ber Hockey India chuan champion player zawng zawngte chu Rs 2,00,000 ṭheuh an pek tur thu an puang nghal a, team enkawltu coachung staff hnenah Rs 1,00,000 ṭheuh pek a ni bawk ang.

Mizo tleirawl pahnih

Kum 2014 aṭang khan Lalthantluangi leh Lalrinpuii te hian Women’s Hockey Academy-ah hockey an inzir ṭan, helai hmun hi Lalremsiami Hmar inzir chhuahna hmun kha a ni a, anni pahnih hian Pathian hnen aṭanga thiamna an dawn tih punna hmun atan an hmang ve bawk.

Thenzawla anmahni zirtirtu Lalroṭhuami (Bte-i) chuan, "Tluangi hi middle shool sports neih laia a chevel hmuh aṭanga hockey khel tura sawm a ni a, a taima in naupang zuanzang tak a ni. Infiamna ngaina mi am nih avangin hockey pawh a thiam chak hle," tiin Vanglaini a hrilh.

Asia Cup khelh zawh takah khan Lalthanluangi hi India tan tlarhnung lamah a pawimawh, an khingpui lamin goal khung tuma an nawrna tam tak lo chhu chattu niin, tlarhma lama awm a ṭhiante ball pe thei tel bawk a nihna chu a danglamna a ni.

Hockey coach Bte-i chuan, "Lalrinpuii hi a naupan laiin midang chunga leng a ni bik lo, mahse ball thunun a theiin a tumruh em em a, hautak leh hahthlak tak pawh ni se a hmaa tih tur awm chu ṭha taka hlen chhuak mi a ni," tiin Vanglaini a hrilh.

Rinpuii hian Mizoram tan kum bithliah inelna lamah goal a lo khung nual tawh a, tun ṭuma India an champion theih nan pawh hian goal khat a khung, goal khung tam lo mah se match tinah India tana player pawimawh a ni ṭhin.

Lawmpuina thu

Hockey Mizoram chuan thuchhuah siamin, Women's Junior Asia Cup 2024 neih zawh taka India champion puitu Lalthanluangi, Kanghmun South leh Lalrinpuii, Hnahthial te chu an chhuang hle tih an sawi.

Mizo tleirawl pahnih thawhrimna zarah hockey chu chawisanin a awm leh ta niin asawii, "Player mai bakah anmahni enkawla chhawr chhuakte coach te chungah pawh kan lawm, an thawhrimna hi a fakawm hle.

"Tluangi leh Rinpuii te hlawhtlinna hi Hockey Mizoram chuan a lawmpui takzet zet a, tun aia sang zawk thleng leh zel turin duhsakna kan hlan," tiin an player pahnih chungchang an sawi.

Sports Minister Lalnghinglova chuan lawmpuina thu sawiin, "Mizo tleirawl pahnih - PC Lalrinpuii leh Lalthantluangi - te telna India team Women’s Junior Asia Cup, 2024 a an champion hi ka lawmpui a, a bikin kan Mizo nula te ka chhuang takzet a ni.

"Hnahthial tleirawl Rinpuii leh Kanghmun ‘S’ tleirawl Tluangi te hi Thenzawl-a Women’s Hockey Academy aṭanga inzirchhuak ve ve an ni a. Academy leh Hockey Mizoram hruaitu, lo enkawl a kaihruai tawhtu zawng zawngte an fakawm a, hei aia sang zawk thleng zel turin duhsakna ka hlan a ni," a ti.