Kevin Durant a dam tawh

NBA player ṭha zual zinga mi Kevin Durant chu season khat chhung a inkhelh theih loh hnuah a dam leh ṭan tawh a, inkhel turin la inpeih chiah lo mah se hun rei vak lo hnuah training pangngai a zawm leh thei tawh ang.

American star hian nikum khan Golden State Warriors aṭangin Brooklyn Nets a pan. Beiseina sang tak nen Nets zawm mah se a keartui a hliam, a club thar tan hian a la inlan thei lo a ni.

Kum 32 mi Durant chuan, "Tuna ka hliam ang hi tun hmain ka la nei ngai lo. Thla li chhung vel kein ka kal lo a ni a, ka kal theih tirh kha chuan a harsa ka ti hial. Tunah chuan zawimuangin hma kan sawn zel a, ka zuang leh thei tawh.

"Inkhel loa season khat tawp mai han awm chu a hrehawm, infiammi tan chuan a aia hrehawm a awm leh thei tawh chuang lo ang. Ka taksa a chak ṭhat leh theih nan theihtawp ka chhuah mek a, hun rei lote hnuah ka inkhelh leh theih ka beisei," a ti.

Oklahoma City Thunder tan pawha khel tawh Durant hian 2017 leh 2018 khan Golden State jersey ha chungin NBA nomawi a lo chawi tawh, season tharah hliam nei loa a inlan thei a nih chuan Nets tan danglamna thlen tur khawpa theihna nei sang a ni.