Puipuia'n palaihawl title a humhim

Mahindra XUV3XO Mizo Inchai Title Fight 2024 zan khatnaah Palaihawl Title Fight neih a ni a, champion lai Remruatpuia chuan amah chotu Ngursangzuala chu thawh sawm an inchai hnuah 49-3 a hnehin a title a humhim.

LPS Arena, Falkland Venga inchaiah Nulaihawl Title Fight neih nghal a ni bawk a, champion lai Elizabeth Rohlupuii chuan amah chotu Penticost Lawmsangpuii chu thawh nga an inchai hnuah 59-0 a hnehin a zawnin a champion ve bawk.

Inchai an neih hmain Remruatpuia chuan a inrintawk thu leh champion title hum theih a inrin thu a sawi, a sawi lawk ang ngeiin thawh (round) hmasa ber aṭangin a chungnung zawk a, a tawp thlengin a talbuai zui lo.

Saitual wrestler, tuna Bethlehem Vengthlanga khawsa ta Puipuia hian a khingpui Ngura hi a hma zawng leh hnung zawngin a bawhbet a, a khat tawkin a nawr chhuak deuh reng thei bawk, thahrui nei pahnih inchaiah tawnhriat a neih ṭhat zawkna a lang.

Palaihawl champion Puipuia chuan, "Ngura kha wrestler ṭha tak a ni a, kan inchai tawk hle, a tawpah chuan Pathian zarah a vannei zawkah ka ṭang a ni. Min sponsortu Sky High Auto te chungah ka lawm a, ṭha takin ka inchai theih phah.

"Kan inchaina hmunah kan veng Bethlehem Vengthlang YMA leh mipui ten min ṭawimawm ṭha em em a, an chungah thinlung takin ka lawm. Saitual lamah pawh kan inchai kha big screen in an lo en tih ka hria, an chungah ka lawm bawk," tiin Vanglaini a hrilh.

Puipuia'n champion kawnghren humhimin Rs 50,000 a dawng a; amah chotu leh vanduai zawka ṭang Ngura'n Rs 30,000 hlawh chhuak thung a ni.