Neih ang hman thiam a ngai - Arteta

Arsenal chuan zanin dar 1:30 hian Champions League khel turin AS Monaco an lo mikhual dawn, coach Mikel Arteta chuan player hliam vangin buai deuh mah se a inkhel thei midang te chu hman thiam an ngai tih a sawi.

Gunners hian an defender pawimawh Gabriel Magalhaes chu tun hnaiah an chawr thei lo. Premier League lamah Manchester United leh Fulham a hmachhawn thei lo a, a hmun ruakah Jakub Kiwior dingin William Saliba nen an inkawp ṭhin.

Gabriel chauh a ni lo a, defender dang pahnih Ben White leh Riccardo Calafiori te pawh hliam vangin an chawk mek a, coach Arteta tan tlarhnung lama khel tur player siamrem a ngai ṭhin a ni.

Arteta chuan, "Jakub-a'n a hna tlin takin a thawk ṭhin a, kan tan chuan a lawmawm hle. Player khel thei lo kan ngah avangin tlarhnung khelh dan phung kan tih danglam hlawk a ṭai hian ṭhin.

"A khel thei lo te kan ngai a, an lo kir hun kan nghakhlel. Chutihrualin, khelmual chhunga lut turin player dangte pawh an ṭha tawk a, kan neih sate kan hman thiam a pawimawh," tiin a sawi bawk.

Ligue 1 club lakah hian Gabriel leh Calafiori te an inlan theih a rinawm tawh a, a tir aṭanga an khel tluan vek lo a nih pawhin hun eng emaw ti chhung chu an khel thei tawh ang, kar tawpa Everton an mikhual hnuah chuan dam pangngai tawh tura beisei an ni.

Arsenal hian Champions League match nga an khelh aṭangin point 10 an hmu a, playoff khelh ngai loa last 16 lut thei tur zingah an awm mek, match dang khelh ngai loa tlang turin an kutah engkim a awm tihna a ni.