December 17-ah Denic-a inlan dawn

Mizorama arm wrestling event lian ber tur, Pro Panja Mizoram Mega Match chu December 17 hian neih a ni dawn - he hunah hian Mizo ban elh chak Denic Lalruattluanga pawh a inlan dawn a, Kazakhstan arm wrestler lar Assanali nen an inhmachhawn ang.

ITI Veng tlangval Denic-a chuan, "Ka huphurh miah lo a, ka tiatpui ka hneh lohna chhan tur ka hre lo," a ti a, Lammualah Kazakhstan tlangval hneh ngei a tum thu a sawi.

He hunah hian Denic-a bakah Mizo arm wrestler ṭha, Lunglei Venglai tlangval C. Lalnunpuia, Chaltlang Lily Veng chhuanvawr Raymond K. Lalrinpuia, Tlangnuam Vengthar lam mi Vanlallura leh Champhai tlangval B. Lalremruatkima te an inlan dawn bawk.

Nunpuia hi All India Police Meet-ah vawi tam lo champion tawhin, Champion of Champions pawh vawi thum ngawt a ni tawh a, ani hian Kazakh lam mi tho Bekzhan a hmachhawn ang - hei pawh en châkawm a tling.

Raymond hi India aiawh hiala lo feh chhuak tawh niin, Vanlallura hi Denic-a ang thoa Pro Panja League lama inlan a ni a, Remruatkima hi national junior-a Mizoram aiawh thei, hmabak nei êng tak a ni - Indian arm wrestler vek anni pathum hian an hmachhawn dawn.

Pro Panja Mizoram Mega Match hi Mizoram Winter Festival neih laia neih tur niin, December 17 zan bik hi arm wrestling puala dah a ni - arm wrestling bakah zai a awm dawn bawk a, zai tur zingah Youth Icon star J. Lalrosanga a tel.

Mizoram sporst minister Lalnghinglova Hmar chuan, "Festival a nih angin en man a awm dawn lo a, ngun taka kan ngaihtuah hnuin a duh apiang tana chhim theih tura en man awm loa buatsaih kha a ṭha berin kan hria a ni," a ti a, Mizo mipuite Lammuala Mizo ban elh chakte en turin a sawm.

Tetea Hmar chuan, "Krismas leh Kumthar inkar hi a tira kan tinzawn deuh chu a ni. Mahse, Krismas hma, Aizawl khawpuia Mizo mipui tam tak kan fuankhawm lai hi ni se kan ti leh a, Aizawl khawpui chauh lo tan pawh Krismas bazar paha en theihna hun awm kha kan duh ta deuh a ni.

"Winter Festival hman lai a ni a, zan khat tawp kan puala min petu Tourism department chungah pawh kan lawm hle," a ti a, television lama en duh tan Zonet chuan pay-per-view in an pe chhuak dawn a, Rs. 100+tax in a en theih ang.

Mizoram Arm Wrestling Association chuan, "Kan beisei ṭhin, kan duhthusam chu sorkar hmalaknain kan thleng thei dawn a, a bik takin kan Sports Minister chungah kan lawm hle a ni," tiin lawmthu an sawi.