Mizo inchai 'Title Fight 2024' hmawr bawkna; Sangliana'n Rinchhana bawhbeh ngei a tum!
Mizo inchai palian champion lai Lalsangliana chuan amah chotu Lalrinchhana Sailo chu behbeh ngei a tum tih a sawi a, bawhbeh mai bakah a chawi kang dawn niin a sawi - ti thei tak maw!
Zanin dar 8:00 hian Mahindra XUV3XO Mizo Inchai Title Fight 2024 hmawr bawkna chu LPS Arena, Falkland Vengah neih a ni dawn a, a hmunah en theih a ni ang. Mahni in lum aṭanga en duh tan LPS 1 leh LPS YouTube lama en theih a ni dawn bawk.
Sangliana inringtawk
Mizo inchai palian huangah kum 2014 aṭangin Lalsangliana a la champion ngar ngar a, a hmaa ding apiang a hneh zel. Upper Republic star chuan, "Ka khingpui apiangin min hneh an tum ṭhin a, mahse tun thlengin min la hneh thei lo.
"Chutiang bawk chu tun ṭumah pawh hian a thleng ang. Pathian zarah ka hrisel ṭha a, ka inbuatsaihna a ṭha bawk. Kan in rih hleih deuh bawk a, a kang zawlsam viau ang a, a ber awlsam viau bawk ang," tiin a inringtawk hle.
Sangliana hi 5ft 11in a sang niin kg121 zeta rit a ni a, tihrawl a ngahin a taka a lian ṭha hle, a khingpui tur Lalrinchhana Sailo hi kg 97 a ni thung a, an inrih hleihna hi kg 24 lai a nih avangin Rinchhana tan fimkhur a ngai dawn tih chu a chiang.
Palian champion lai chuan sawi zawmin, "Training ka neih laiin eng harsatna mah ka tawk lo a, ka duh anga hautak takin inbuatsaihna pawh ka nei thei, chuvangin ka inrngtawk hle a ni," tiin a sawi a, tun hma alam a khingpui a lo hneh tawh ṭhin ang ngeiin chak a tum tih Vanglaini a hrilh.
Rinchhana zam bik lo
October thla tir lam khan Lalrinchhana Sailo hian Mizoram Wrestling Association (MWA) hnenah inchai hun sawn a dil a, hliam a neih vang nia sawi a ni. Mahse, MWA hruaitute, technical mite leh media lama an thawhpui LPS Vision aiawhten an ngaihtuah hnuah an hun an sawi lo.
Inbuatsaihna a nei chhunzawm a, North Vanlaiphai tlangval Lalrinchhana hi a zam bik lo. Rinchhana chuan, "Sangliana hneh ngei turin theihtawpin ka inbuatsaih a, ka hneh ngei ka ring. Kg 24-in rit zawk mah se a theih chuan chawi kan ngei ka tum ang.
"Ka ṭhianten theihtawpin ka inpuahchahnaah min pui a, a ṭha thei ang berin ka inpuahchah a, ka hneh ngei ka ring," a ti. A rih zawngah chuan a zâng zawk ni mah se, san zawngah an inchen tawk a, thahrui ngah leh tharum hmang thei a nih ve tho avangin a zam bik lo.
Palian champion cho thei turin Lalrinchhana hian kalkawng thui lah hautak tak a zawh chhuak thei a ni a, a hmaa ding a hneh ṭhin. Sangliana lakah erawh fimkhur leh mahni inveng thiam taka a khelh a ngai dawn a, a tawp thlenga ṭan theih a pawimawh ang.