Chhanhima'n Awp-a bawhbeh a tum

10th December, 2024

Mahindra XUV3XO Mizo Inchai Title Fight 2024 chu zaninah chhunzawm a ni dawn a, pate leh nute huangah title fight neih a ni dawn. Lalchhanhima chuan hun rei tak a lo kawl tawh, tun hnaia a hloh tak 'Pate Title' chu B. Lalawmpuia hnen aṭangin chhuhsak ngei a tum tih a sawi.

LPS Arena, Falkland Vengah inchai hi neih a ni dawn a, a hmunah a en theih dawn a, TV lamah chuan LPS 1 leh LPS YouTube lamah en theih a ni bawk ang. Title fight bakah hian Freestyle Wrestling (Exhibition) a awm dawn bawk.

Kum 2014 aṭanga kum 2021 chhung kha Lalchhanhima hian Mizo Inchai Pate Title a hum thei a, mahse kum sarih hnuah B. Lalawmpuia'n a chhuhsak. Chhanhima chuan, "Ka tiat puia chuan Awpa chauh hi min bawhbet thei a ni a, chuvangin ka bawhbet let ve ngei ang," tiin Vanglaini a hrilh.

Saitual wrestler Chhanhima hian an inchai hmasak hnua khan inchai a chawlhsan thu a puang a, mahse tualchhung inchai ngaina tuten an ngen nasat avangin kuminah hian a lo kir leh a ni. Chhanhima chuan, "Lalawmpuia hneh tur hian ka inbuatsaih tha tawk a, ka fit tha tawkin ka hria," a ti.

Kum 2014 khan Chhanhima hian Pate Challenger Final-ah Awp-a hi round tinah a bawh bet a, a chawi kang bawk. Mahse, kum 2022 khan Title Fight an neih tumin Awp-a hi a chak thung a, Chhanhima bawhbet thei awmchhun a ni.

Pate champion lai B. Lalawmpuia chuan, "Ka bawhbeh zat tur ka sawi lo ang a, mahse, champion kawnghren hi chu ka kutah a awm zel dawn." a ti, a inchai hi a hmuhnawm dawn tih a chiang hle.

Nute huangah champion lai Lalvenhimi, Bethlehem leh amah chotu Lalnunsangi, Kolasib te an inchai dawn bawk. Anni pahnih hian inrintawkna sang tak an nei ve ve a, theihtawp chhuaha inbutsaih an nih avangin an inchai pawh a hmuhnawm ang.

Lalvenhimi chuan "Pathian zarah hriselna tha ka nei a, ka chhungten min thlawp tha bawk a; engkimah theihtawp ka chhuah bawk a, (ka hneh nawn leh nawn loh chu) a hunah a hriat mai ang,' a ti.

Phuba lak ngei a tum thu sawiin Lalnunsangi chuan, "Nikum hmasa (Title Fight hnuhnung berah) khan ka hneh tawh lo a, kuminah chuan champion nih ka tum a ni. Theihtawpin champion ngei turin ka inbuatsaih a, hlauhna ka nei lo," a ti.