Inter Village Football 2024 : Ramhlun North leh Tlangnuam ten semifinal an lut

GIG Motors Inter Village Football-ah Ramhlun North-in champion rinkai ni pha Bawngkawn an pet tla a, quarterfinal inkhel dangah Tlangnuamin Lengpui 3-1 in an hneh bawk.

December 9, Thawhṭanni hian RG Stadium-ah semifinal khelh a ni dawn. Tlai dar 3:00-ah Aizawl khaw pawn pahnih Kolasib Jt leh Melbuk te an inkhel ang a, zan dar 7:00-ah Ramhlun North leh Tlangnuam te an inkhel ang.

Bawngkawn an tla

Inter Village Football-ah Bawngkawn thawm a ring a, coach Lalrindika Hmar hoin nomawi hawn an inbeisei hle. Mahse, Bawngkawn ang thoa nomawi chawi châka tui hal Ramhlun North an chak ta zawk.

Ramhlun North-in minute 33-naah goal an khung a, vei lam aṭanga ball vawrhluh chu box chhunga awm F. Lallawmkima'n tauh letin Vanlalhruaia'n kawh zetin a pet goal. Coach H. Lalremruata hote hian halftime hma chiahin goal khung theihna an nei a, dinglam aṭanga Lalnunsanga cross ṭha bik chu vengtu nei lo Lawma'n goal zawnah tauh thei lo.

Coach Rindika'n risk lain zing lama Chanmari FC training zawm Joseph Lalvenhima leh JH Remlala te a luhtir nghal a, a hnu deuhah K. Lalruatdika pawh a inlan ve bawk. Bawngkawnin dinglam aṭanga cross ball chu Joseph-a'n box chhung aṭangin minute 75-naah siphurh a sut.

Hun pangngaiah goal a luh belh lo a, 1-1 in inkhel a tawp. Penalty shootout-ah Bawngkawnin pet hmasain Joseph-a'n a pet goal lo nghal a, K. Lalremmuana leh Lalremruata te pawhin hlahin Laltlanhlua chauhin a pet goal. Ramhlun North tana pettu F. Lallawmkima, Martin Lalhmingtluanga leh V. Lalhriatrenga te erawhin an pet goal vek.

Goalkeeper Lalchhanchhuaha Sailo zarah Ramhlun North 3-1 in an chak a, team ṭha bik Bawngkawn an hneh avangin inrintawkna an ngah sawt ang.

Tlangnuam an chak

Tlangnuam leh Lengpui an inkhel tawk a, CYMA Football 2023 finalist-in goal an khung hmasa. Minute 28-naah M. Lalpekhlua penetration pass ṭha zet chu Vincent Lalduhawma'n um lutin cool zetin a pet lut.

Minute 41-naah Lengpuiin siphurh an sut a, vei lam aṭanga Jonathan Roliantluanga cross chu goalkeeper Joseph Laltluangpuia leh defender C. Malsawmkima te insu buaiin Tlangnuam defender-in an lamah a tauh lut.

Tlangnuam an chungnung bik lo a, Lengpui lamin an khel thei hle. Second half-ah Vicent-a'n a penalty hlawhchhuah chu goal-ah a chantir a, Tlangnuamin 2-1 a hma an hruai hnuah Lengpui goal nawr a na sawt.

Lengpui hian siphurh sutna remchang pawh an nei a, mahse goal hmaah an vanduai, crossbar an pet per bakah an goal khung dang pakhat chu box chhunga foul a awm avangin pawm a ni lo.

Player tlan chak Vanlaldinpuia'n ding lam aṭangin chak takin a lalut a, goalkeeper-in a pet hmasak dansak mah se DP-a hian a per hi minute 90-naah chiang takin a khung.

Tlangnuamin goal thumna an lawm laiin Lengpui erawh referee chungah an lawm lohna lantir a, player pawimawh pahnih Lalrokima leh captain Lalchhuanmawia ten red card an hmu. Tlangnuam lamah bench-a awm T. Lalhmingsanga chu hnawhchhuah a ni bawk.

Inkhel tawp lam boruak a ṭang ṭha a, mahse Francis Vanlalpeka kaihhruai Tlangnuamin goal thum an khung tawh avangin harsatna an tawk tawh lo, 3-1 in an chak.