Inter Village Football 2024 - Quarterfinal lut a hriat kim ta

GIG Motors MFA All Mizoram Inter Village Football C'ship 2024 round of 16 chu nimin khan khelh zawh a ni ta a, quarterfinal lut a hriat kim ta.

Nimin inkhelah Ramhlun North, Bawngkawn, Tlangnuam leh Lengpui ten an khingpui ṭheuh hnehin quarterfinal an lut a, Kolasib Jt VC, Bethlehem Vengthlang, Melbuk leh Armed Veng hnung zuiin, a thiam pariat zingah an hming an ziak kai.

RG Stadium, Mualpui lamah goal a sur a, Ramhlun North chuan 5-3 in Chanmari West an hneh. Ramhlun N tan Rodinmawia leh F. Lallawmkima ten goal hnih ve ve an khung a, Lalnunsanga'n goal khat a khung bawk.

Chanmari W hian 3-0 a nih laiin Malsawmdawngkima leh K Lalremsanga goal hmangin beiseina an nei hman a, mahse, goal hnih dang an chhuah leh avangin hun pek belha Lalremsanga goal-in awmzia a nei phak lo.

Bawngkawnin player chhuanvawr MS Dawngliana leh Laltlanhlua hmangin Zemabawk North lakah vawi hnih hma an hruai a, mahse, Zemabawk hian Lalmungliana leh Saihlupuia Sailo hmangin si phurh an sut - team pahnihin goal khung belh an harsat a, penalty hmanga chinfel zui niin, Bawngkawn hi 2-1 in an vannei.

1st Bn MAP Ground, Armed Venga inkhelah Tlangnuamin Sihphir Venghlun lakah zahngaihna an lantir lo a, MPL club nei veng hi 4-1 ngawtin an sawp. Tlangnuam hian minute 45 chhungin an goal khungte hi an khung vek hman - Vincent Lalduhwma, Vincent Laltluangzela, Vanlaldinpuia leh M. Lalpektluanga ten goal an khung.

Sihphir Venghlunin minute 45-naah Lalnunsanga hmangin goal khat an chhanglet - 'comeback' turin hun la tam tawk mah se, goal dang an khung belh tawh lo a, 4-1 in Tlangnuam an chak.

Nimin inkhel ngaihven hlawhah Chhinga Vengin Lengpui an ngam lo - Mizoram football-a veng/khua langsar pahnih inkhelah Chhinga Vengin goal an khung hmasa zawk a, tawnhriat nei ṭha R. Malsawmtluanga'n minute 30-naah goal hmahruai a khung.

Mahse, Lengpuiin tlawm an duh lo - second half-ah Lalchungnunga hmangin si phurh an sut a, minute 74-naah Laldinsanga 'penalty' hmangin chakna goal an khung zui a, Chhinga Vengin an duh aia hmain Inter Village Football inelna an mangṭha.