Vawiinah Inter Village Football Quarterfinal : Kolasib dal theitu Sanga hote

GIG Motors MFA All Mizoram Inter Village Football C'ship 2024-ah Kolasib Jt an chet ṭhat em avangin champion rinkai an ni phak a, vawiin chawhma dar 11:00 hian Lalsangzuala Hmar enkawl Bethlehem Vengthlang nen RG Stadium-ah quarterfinal an khel ang.

Kolasib Jt hian Thawhṭanni khan team ṭha Republic Veng chu 5-0 in an sawp a, hemi hma hian Mission Veng (5-0) leh Sakawrtuichhun (21-0) te an sawp tawh bawk. Coach Lalchhuansanga hote hian match thum lekah goal 31 khungin goal an la chhuah lo a, an record hi a ṭha hle.

Goal khung thei Kolasib hian game mawi an khel thei a, kil tinah ball an inpek kual theih avangin team hmuhnawm an ni. Midfielder ṭha mi Paul Ramfangzauva'n goal nga a khung tawh a, a goal khung aia langsar chu a ball pass a ni.

Chutihrualin Kolasib hi player pakhatah chauh an innghah lo a, Paul-a thlawp tur hian tlarhma lamah William Lalnunfela (goal 1), PC Pazawna (goal 5), RM Zothansanga (goal 4) leh Isak Malsawmkima (goal 6) te an awm. Striker hna chelhtu William hi a goal khung aṭanga teh chi a ni lo - a football hriatna leh thiamna hmangin midfield nen an inzawm ṭha hle.

Bethlehem Vengthlang hian Marpara (4-1), ITI Veng (2-0), Hriphaw (7-2) leh Salem Veng (0-0 Pen 3-2) te an hneh tawh a, team ṭha Salem Veng hmachhawn tawh mah se Kolasib anga team ṭha an la hmachhawn lo.

Coach Lalsangzuala Hmarin hna a ngah dawn a, a player neih angte a rem dik a pawimawh dawn. BVT hi rinkai lo zawk ni mah se team chhia erawh an ni hauh lo a, Hmingthanmawia leh Lalrammawia ten an ho peih a, midfielder chhuak thar ṭha zinga mi Emmanuel Lalhruaizela te pawh an kawl. Chutihrualin Kolasib an hmachhawn dawn miau avangin chak tur chuan coach Sanga'n ngaihtuahna a sen lehzual ṭul dawn a ni.