Inter Village football a 'hot' chho zel

G.I.G Motors MFA All Mizoram Inter Village Football Championship 2024-ah team tenau an awm ta meuh lo - vawiina inlan tur pawh team ṭha vek an ni. Inkhel hi Zonet Zawlbuk leh YouTube-ah a en theih ang.

1st MAP Ground, Armed Vengah inkhel pathum a awm dawn. Chawhma dar 10:00-ah Farkawn leh Zemabawk North te an inkhel ang a, Ramhlun North leh Chanmari te chhun dar 12:00-ah an inkhel chhunzawm ang. Chawhnu dar 2:00-ah Chanmari West leh Electric Veng ten an tawp an khar dawn.

Team ṭha 2

Farkawn leh Zemabawk North te hi champion tura rinkai ni phak si lo, mahse team ṭha ber pawh hneh thei tura theihna nei si an ni a, an intum tawk viau turah a ngaih theih.

Zemabawk North hian I League vangin Samuel Lalmuanpuia leh Peter Lalrinhlua te chhawr thei lo mah se tawnhriat nei ṭha David Lalrinmuana'n a ho peih. Theihna nei sang Freddy Lalrinchhana te an awm a, Farkawn aia ṭha zawkah an inngai ang.

Chutihrualin Farkawn hian Mizoram defender Lalhmangaihsanga bakah MPL-a inlan tawh Tea Chinzah Remlalfaka leh Lalrinpuia te an nei a, midfield-ah vawi tam Farkawn innghahna ni tawh Lalthawmmawia te an la awm avangin last 16 luh an inbeisei ang.

Chanmari an ṭha

Chanmariin MPL club neih an chhawr a, Inter Village Football-ah champion rinkai an ni pha. Tlarhnungah Lalrinchhana Tochhawng a awm a, kawppui tur erawh a nei ṭha tawk lo.

Mahse, tlarhma lamah Lalkhawpuimawia, PC Lalruatsanga, Moses Lalrinzuala leh John Lalrempuia Sailo te an awm a, champion pui tham an ni pha. Mahse, an khingpui tur Ramhlun North hi First Division club nei an ni a, coach tawnhriat nei ṭha H. Lalremruata'n a ho bawk avangin tawh an khirh ang.

Ramhlun North hian First Division player bakah Mizoram striker F. Lallawmkima, Vanlalhruaia (Mahruaia) leh Rohmingthanga te an awm a, bench lamah Laldampuia leh V. Lalchhuanawma te awm bawk. Chanmari ṭha zawka ngaih theih ni mah se chak tur chianga dah a rem lo.

Team intluk tawk

Football thiam veng Electric Veng leh Chanmari West ten an tawp an khar dawn. Electric Veng hi tualchhung football-a nomawi chawi ṭhahnem tak chawi tawhtu HC Zarzoliana'n a ho a, Chanmari West hi an veng pa H. Lalnunzira'n a kaihruai thung.

Electric Veng hian tlarhnungah Zothanpuia leh Laldinsanga te an nei a, midfield-ah Vanlalremkima (Tetea) la awmin futsal khelh thiam vanga lar Lalsangkima hi football-ah pawh a duai lo hle. Goal nawr turin Lalbiakhlua (Biaktea) a awm a, Mizoram Police winger hi captain a ni.

Chanmari West lamin midfield khai khawm turin Lalengmawia an kawl a, tlarhma lamah Lalremsanga leh A. Lalhruaitluanga te an awm. Mamawh dana a zira la inlan thei turin Zirtea a inziak lut bawk a, Chanmari West leh Electric Veng te hi inhnehtawk tura ngaih an ni.