Liverpool khelmualah hmelma kumhlun Real Madrid

Real Madrid hi awm lo ta se, Jurgen Klopp khan Champions League nomawi pahnih a chawi belh ang a, Mohamed Salah pawhin European club inelna sang bera nomawi hi pakhat aia tam a kawl ang - mahse, Real Madrid an awm miau a, Spanish team hi Liverpool lakah an 'hrang' hret ṭhin.

Liverpool fan-te zawt ila, Champions League-ah Real Madrid aia petchhuah châk hi an nei kher lo ang tih ngam a ni a, Reds tan chuan chuti khawp chuan a ni, an hnawksak ni - team pahnih hi zanin dar 1:30-ah an intawng dawn a, Real tan Anfield-ah hnehna hlado chham a ṭul.

Premier League hmahruaitu Liverpool hian Champions League-ah pawh hma an hruai mek a, match li an khelh tawh aṭangin an chak vek - an tan last 16 lut turin kawng zau taka hawnin a awm mek a, Real erawh 'thih leh dam karah an leng' tiin sawi ila, uar lutuk kan ni lo ang.

Carlo Ancelotti enkawl team hi champion lai ni mah se, match li an khelh tawh aṭangin point ruk an nei mek - table-ah 18-na an ni mek a, knockout playoff khel thei dinhmunah ding mek mah se, zaninah an tlawm chuan tla thei dinhmunah an ding zui dawn.

Thawnthu hlui

Champions League-ah team pahnih hi vawi 11 an intawng tawh a, Real Madrid an chungnung hle - vawi sarih a chak zawkah an ṭang a, vawi thum an in draw. Liverpool hian vawi thum chiah hnehna an chang ve tihna a ni.

Madrid-in Reds lakah goal 17 ngawt an khung laiin Liverpool hian goal 10 chiah an khung ve thung a, Champions League-a team pahnih inthlauhna hi a sang rem rem hle. Real-in thawnthu hlui an keu let ang a, Liverpool an zuam sawt ang.

Mahse, ni e, mahse tih a ngai tlat - Liverpool tluka team 'form' hi tun season-a European top five league club zingah an awm lo a, Real hian duhthlang thei ni ngat se, an hmachhawn turin Reds hi an thlang lo ang, tih hi sawi ngam a ni.

Real hian tun season Champions League-a match li an khelhah vawi hnih hnehna changin, vawi hnih an tlawm a, an ngam loh hi Lille (1-0) leh AC Milan (3-1) an ni a, Anfield-ah an chak theih chuan an phur sawt ang.

Phuba chu

Tun hnaia Liverpool leh Real boruak ti 'hot' thartu chu tun hnai season sarih chhunga vawi ruk an intawn chu a ni - kum 2018 final-ah khan Real Madrid hian 3-1 in Liverpool an hneh a, hemi hnuah hian Reds hian Real an hmachhawnah chak an nei tawh lo!

Kum 2020-21 quarterfinal-ah an intawng leh a, Anfield-ah 0-0 in inhnehtawk mah se, Santiago Bernabeu-ah 3-1 a an tlawm avangin Liverpool an tla! 2021-22 season final-ah an intawng a, final an intawn hmasaka tihluih ang hiala chhal theiha Sergio Ramos-a'n a hliam Salah a ṭawng chhuak.

Egyptian forward hian, "Chinfel tur kan nei e," tiin social media-ah a tarlang a, Madrid laka chak a tum hle. Mahse, inkhel thunun zawk ni chungin Reds hi 1-0 in an tlawm a, Real ṭantuten social media lamah fiamthu thawh nan Salah an hmang zui.

Liverpool hian 2022-23 khan last 16-ah Real an tawng leh a, phuba lakna remchang nei leh mah se, first leg-ah 5-2 ngawta an tlawm hnuin an tho tawh lo a, Bernabeu-ah 1-0 a tlawm zuiin an tla - zanina Real hneh a, last 16 luhna chance tihhniamsak hi Salah leh a ṭhianten an châk tur chu a ni.

Salah chu

Kum 2022 final-a phuba lak tum tawh Salah chu tun thlengin Liverpool tan khaipa ber a la ni reng a, season duhawm tak a hmang mek. Egyptian forward hian tun season inelna hrang hrangah match 18 khelin goal 12 a khung leh der tawh a, assist vawi 10 a nei bawk.

Kum 32 mi forward hian Real lakah phuba lak a la châk reng ang tih a chiang a, zaninah pawh Real hian an ven bik loh chuan an tisual ang. Hetihrual hian Reds hian tlarhmaah Luis Diaz, Cody Gakpo leh Darwin Nunez te an la nei tel tih hriat a ṭha a, Diogo Jota inhliam mah se, an buai lo.

Colombian forward Diaz hian tun season inelna hrang hrangah match 17 khela goal kua khungin, assist vawi hnih a nei tawh a, Gakpo pawh a theihna tak tak hmuh tirin kan awm mek - match 18-ah goal ruk khungin, assist vawi hnih a nei.

Nunez-a'n match 15-ah goal thum leh assist vawi hnih chiah la nei mah se, khelmuala hun a la hman tam tawk loh vang tih hriat tel a ṭha a, season duhawm tak hmangtu Liverpool hian goal khung tur an tlachham lo.

Inlan tur

Arne Slot-a'n Anfield-ah fimkhur takin a team a remkhawm a rinawm a, 4-2-3-1 in an khel thei ang. Alisson-a'n training zawm tawh mah se, Real laka bul ṭantir nghal tur chuan a la hma hret a, Brazilian keeper awm loh hlana Caoimhin Kelleher a chet ṭhat tho avangin Reds tan hlauhthawn tur erawh a awm lo.

Real Madrid nena sawizawm hlawh Trent Alexander-Arnold-a hliam dinhmun a la chiang lo a, English right back hi a inlan thei lo a nih chuan a hmun ruaka ding turin Conor Bradley a awm a, Ibrahima Konaté, Virgil Van Dijk leh Andy Robertson te chu bul ṭan chiang tura beisei an ni.

Midfield-ah Ryan Gravenberch-a'n season duhawm tak a hmang mek a, Alexis Mac Allister nena an inkawp thei dawn - tlarhmaah Nunez a mal tlat ang a, mual sir aṭanga thlawp turin Salah leh Diaz an awm ang.

Nunez-a hnung chiaha ding turin Dominik Szoboszlai a awm bawk - tun season-ah Reds player-te 'form' lo mang bar an awm lo a, Real tan Anfield-a Liverpool hneh hi a harsa dawn tih a chiang.

Vinicius tel lohna

Real-in Anfield an lenglut dawn a, an duhthusamah chuan an player neih ṭhat berte nena lawi luh an châk ang. Mahse, hliam vangin Vinicius Jr a tel thei dawn lo chiang a, Brazilian forward hi thla khat vel chu malpui hliam vangin a chawl dawn.

Real hian an league match hnuhnung berah 3-0 in Leganes an hneh a, he inkhelah hian Ancelotti-a'n inkawp rem loa sawi Kylian Mbappe leh Vinicius te khelh dan a siksawi a, Liverpool tan a inbuatsaih tih a chiang.

Mahse, Vinicius a inhliam ta si a, Mbappe tan mawhphurhna a sang sawt ang. Rodrygo dinhmun a la chiang lo bawk a, chuti a nih chuan Ancelotti-a'n 4-2-3-1 hmangin, fimkhur takin Anfield-ah a team a khelhtir a rinawm.

He formation hi a hmang a nih chuan tlarhmaah Mbappe a mal tlat ang a, a hnung chiaha Jude Bellingham dingin, mual sir aṭanga goal nawr pui turin Brahim Diaz leh Arda Guler te an lut thei ang.

Madrid buaina hliam

Real hi tun season-ah hliam vangin an talbuai hrim hrim a, zanin an lenpui tur squad hi an ṭhat dan ber a ni lo chiang - tun season Champions League-a an squad pan ber ṭum a ni hial mai thei a, Liverpool an la hmachhawn dawn zui!

Vinicius leh Rodrygo bakah Lucas Vazquez (tihrawl) leh Aurelien Tchouameni (kerek) te hliam vangin an inlan theih dawn leh dawn loh a la chiang lo a, khup hliam vangin Dani Carvajal, Éder Militão leh David Alaba te an inlan thei dawn lo chiang bawk.

Chuti a nih chuan Leganes laka right back-a khelhtir midfielder Federico Valverde hian right back hna a chelh leh a rinawm a, tlarhnung laiah Antonio Rudiger kawppui turin Real tana match hnih chiah la khel Raúl Asencio a awm ang!

Real tlarhnung phuahchawp karah tlarhma nei ṭha Liverpool an inlan dawn a, Ancelotti lu a hai viau mai thei - midfield-ah Eduardo Camavinga a dam ṭha a, a kawppui tur Luka Modric uai thlak leh thlak loh pawh zaninah kan hria ang.