Blasters-in goal thum an khung

Pathianni zan Indian Super League inkhelah Kerala Blasters-in nuamsain hnehna an chang a, an mikhual Chennaiyin chu 3-0 in an hneh - Blasters tan Jesus Jimenez, Noah Sadaoui leh Rahul KP ten goal khat ṭheuh an khung a, hun tawp thlengin goal dang a lut tawh lo.

Blasters tan Freddy Lallawmawma chuan inkhel bul ṭanin, Chennaiyin tan Laldinliana Renthlei-in inkhel bul a ṭan a, bench aṭangin Lalrinliana Hnamte a lut bawk - Chennaiyin tana bul ṭan ṭhang PC Laldinpuia chu hrem vangin a inlan thei lo a, Scottish striker Connor Shields chu damlohna avangin a inlan thei lo bawk a, Chennai club hian hei hi an tuar.