Chawhnu dar 2:00-ah final atana itawm Armed Veng South Vs Bawngkawn

G.I.G Motors MFA All Mizoram Inter Village Football Championship 2024-ah champion tura rinkai zinga mi Armed Veng South leh Bawngkawn te vawiin chawhnu dar 2:00 hian 1st MAP Ground, Armed Vengah an inkhel dawn.

Armed Veng South hi Inter Village Football hnuhnung bera hrem an tawh hnuah MFA hnuaia veng/khua inelnaah an tel leh chiah a, Mizo coach ṭha Lalbiaksanga Colney-in ho a bawk. Bawngkawn hi MPL coach langsar Lalrindika Hmarin a enkawl ve bawk a, player ṭha a neih bawk avangin an thawm a ring hle.

Coach inbeihna

Footballer ṭha tamna Armed Veng South-in veng/khua inelnaah nomawi chawi an harsat a, player ṭha rual enkawl turin an eng ṭhenawm Armed Veng aṭangin nomawi chawi thiam BS-a Colney an lalut.

BS-a Colney hian Mizoram Police chu I Day Football bakah an la chawi ngai loh Mizoram Premier League leh All India Police Meet-ah a te a champion pui a, an veng Armed Veng chu player leh coach angin a champion pui nual bawk.

Rindika hian MPL-ah an veng club FC Venghnuai a kaipui a, final hial a thlenpui bakah MPL Under 18-ah pawh a champion pui. Venghnuai hnuah Rindika hian Chawnpui FC a enkawl a, kum lamah la upa lo mah se tualchhung football-ah sulhnu a ngah tawh hle.

A hmuhnawm dawn

Bawngkawn hian CYMA Football 2023-ah khan squad ṭha bik an nei a, ISL player Isak Vanlalruatfela leh F. Lalremtluanga; I League player Lalromawia leh Augustine Lalrochana bakah Mizoram aiawha khel thei player an kat nuk.

Mahse, Bawngkawn hian semifinal-ah Tlangnuam an hneh lo a, nomawi an chawi ta lo. Tun ṭumah hian nomawi beiseiin Rindika Hmar an lalut a, ISL leh I I League player awm lo mah se squad ṭha tak an din a, MPL club an el phak em loh pawhin First Division club ai chuan an ṭhat zawk a rinawm.

Chutihrualin Armed Veng lam pawh an duai lo hle. Tawnhriat nei ṭha C. Ramdinmawia'n midfield-ah a ho thei dawn a, tlarhnungah FC Goa tan pawha khel tawh Lalhmangaihsanga Ralte bakah Mizoram Police goalkeeper K. Malsawmkima a awm dawn.

Goal khung turin Lalrammuanpuia (Apuia), Lalnunsanga (Talea) leh J. Lalbiakliana (Valpuia) te an awm a, MPL-a goal khung vek tawh an ni. BS-a hote hian an training-na hmunah Bawngkawn hi an mikhual dawn a, ṭantu an ngah dawn bawk avangin inrintawkna an ngah khawp ang.

Inkhel dang

Chawhma dar 10:00-ah Chaltlang Lily Veng leh Armed Veng te an inkhel dawn a, veng inelnaa record nei ṭha Armed Veng hi an muala khel tur an nih bakah player an neih ṭhat avangin chak ngei tura ngaih an ni.

Chhun dar 12:00-ah Lungdai leh College Veng te an inkhel zui dawn. Hetah erawh chak tur hriatthiam a har. College Veng hian First Division club an nei a, Mizoram goalkeeper Zothanmawia awmna a ni bawk. Mahse, veng inelnaah chuan T. Mawia hi outfield player a nih rinawm zawk. Lungdai hi dah hniam a rem lo a, tun hnaiah hma an sawn lehzual a, College Veng hneh thei turah an inngai ang.