Badminton National Championship: Mizoram tana record siamtu C. Lalramsanga & Lalrempuii

Badminton khawvelah Mizoramin bung thar an kai zel - Yonex-Sunrise 47th Inter State-Inter Zonal & National Junior Badminton Championship 2024-ah C. Lalramsanga leh Lalrempuii ten gold medal an hlawh chhuak a, Mizoram record an siam.

National Junior Bad-minton Championship-ah Mizoten gold medal an la hlawh chhuak ngai lo a, he thawnthu duhawm lo hi thaiboa awmin, Mizoram badminton chanchina chuang reng tawh turin Ramsanga leh Rempuii ten an hming an ziak kai.

MPIS Niladri Vihar, Bhubaneswar, Odisha-a neih inelnaah hian Ramsanga hi mixed doubles-ah a partner Vishakha Toppo, Odisha nen an champion a, Rempuii hian girl's doubles category-ah Tanoo Chandra, Chhattisgarh lam mi chu ṭanpuiin, gold medal an hlawh chhuak bawk.

Ramsanga a sang

Durtlang rawlthar Ramsanga hi a ṭanpui Vishakha nen hian seeded no. 5 an ni a, an match hmasa berah Nishkarsh Singh Chauhan leh Vanshika Thakur-te ṭang dun chu 21-19, 21-15 a hnehin, round of 16 an lut nghal - Kartik leh Srija-te inkawp chu harsatna nei loin, 21-9, 21-11 in an sawp zui.

Ramsanga te ṭhian dun hian quarterfinal-ah seeded no. 1 Vansh Dev leh Mayan Ralhan-te an hmachhawn a, a tirah talbuai deuh mah se, 13-21, 21-16, 21-13 a hnehna changin an 'comeback' a, beiseina an neih san lehzual phah - semifinal-ah pawh anni aia seeded sang, no. 3 Bhavya Chhabra leh Taarini Suri-te inkawp chu 21-17, 21-18 in an hneh leh a, final-a seeded no. 2, Bhargav Ram Arigela leh Vennala K. te ṭang dun chu 21-16, 10-21, 21-18 in an hneh.

Ramsanga leh Vishakha-te pahnih hi an inkawp fuh hle - September khan Yonex-Sunrise 31st Smt Krishna Khaitan All India Junior Ranking Badminton Tournament 2024, Panchkula-a neihah gold medal an lo vaw chhuak tawh a, Ramsanga hi Mizo zingah Junior category-a champion thei hmasa ber niin, National Junior Badminton Championship-ah pawh champion thei hmasa ber a ni leh ta.

A hming chu Rempuii

Hmeichhe badminton lamah pawh Mizo hming a mawi - Rempuii leh Tanoo ten girls doubles-a gold medal hlawh chhuak tura an paltlang hi a namai lo hle. An match hmasa berah seeded no. 1, Pravandhika R. leh Reshika U. te inkawp an tum nghal a, hma taka zinkawng tawp theihna ni mah se, rin hlawh zawkte hi 21-19, 21-17 in an hneh!

An hawikir tawh lo - last 16-ah Samridhi Bhardwaj leh Saanvi Nautiyal-te ṭang dun chu 21-17, 21-11 in an hneh leh a. Quarterfinal-ah seeded no. 7, Deepika Devanaboina leh Sravanthi Devanaboina-te inkawp chu 18-21, 21-13, 21-13 in an hneh leh bawk. A tirah match hmasa bera seeded no. 1 tum nghal hi vanduainaah ngaih theih mah se, an chak miau avangin Rempuii te ṭhian dun tana inrintawkna petu a chang.

Semifinal-ah seeded no. 5 Gayatri Rawat leh Mansa Rawat ṭang dun chu 13-21, 21-15, 21-15 in an hneh leh a, final hmuhnawm takah seeded no. 3, Durga Isha Kandrapu leh Taarini Suri-te inkawp chu 23-21, 21-15, in an hneh zui - Rempuii hi Mizo hmeichhe zinga Sub-Junior, Junior leh Senior National level tournament-a champion thei hmasa ber leh medal hrim hrim la thei hmasa ber a ni.

Ramsanga & Rempuii

November 19-25 inkara neih inelnaa champion Ramsanga leh Rempuii te hi National Centre of Excellence, Guwahati-a badminton zir mek an ni a. TATA Trusts (NEIDA) leh Mizoram Badminton Association (MBA) thawh hona aṭanga inzir chhuak, Pullela Gopichand Badminton Academy (PGBA)-ah pawh lo awm tawh ṭhin an ni.

Ramsanga hi Mission Veng Badminton Club player niin, Rempuii hi Ralte Villa Badminton Club player a ni thung. Mizoram Badminton Association (MBA) chuan thuchhuah siamin, Rempuii leh Ramsanga te an lawmpui thu an sawi a, "Mizoram leh India ram tihmingṭhatu ni zel turin duhsakna sang ber kan hlan a ni," an ti.

MBA chuan an player-ten tun dinhmun an thlen theih chhan chu TATA Trusts (NEIDA) te nena an thawhhona vang a nih thu sawiin, TATA Trusts chungah lawmthu an sawi bawk.