I League kan nghak chhuak ta; Mizo hlangin Aizawl FC an inlan dawn
I League 2024-25 season chu nimin aṭangin khelh ṭan a ni a, zanin dar 7:00 hian RG Stadium, Mualpuiah Aizawl FC-in Goan club Dempo SC an mikhual ang. Mizo club hian tun season-ah foreigner an la lo a, state dang player an la neih loh bawk avangin 'Mizoram Team' ti hiala chhal theih a ni.
Aizawl FC coach Victor Lalbiakmawia chuan, "Coaching staff thlengin Mizo hlang kan ni a, Mizo mipui ṭawiawmna kan beisei. Mizo mipui tan theihtawp kan chhuah ang," tiin Vanglaini a hrilh. Inkhel en man hi Rs 100 a ni ang.
Beisei nei AFC
Aizawl FC hi India hmarchhak aṭanga I League champion ni thei awmchhun an ni a, tun ṭumah hian champion rinkai ni pha chiah lo mah se table chung lama awm thei turin theihna sang tak an nei.
Mizo club hian MPL11-ah hneh loh nei loin nomawi an chawi a, league match 14 aṭanga goal 44 an khung bakah goal 10 chauh an chhuah. Knockout chhiar telin Aizawl FC hian goal 48 an khung thei a, I League atan inrintawkna an ngah sawt ang.
Aizawl FC hian season liam taa Indian zinga goal khung tam ber Lalrinzuala an kawl a, Serchhip tlangval hian hliam vangin MPL11 khel mumal lo mah se I League khel turin a dam tawh - bul a ṭan kher erawh a rinawm loh zawk.
Mizo club hian tlarhmaah MPL-a che ṭha Lalhriatpuia, Lalbiakdika leh Augustine Lalrochana te an nei a, Dempo SC lakah pawh an rin nawn mai a rinawm. Chutihrualin hliam vangin Samuel Lalmuanpuia, C. Lalmuanpuia leh Laltlanzova te an chhawr thei dawn lo.
Foreigner an neih dawn loh avangin MPL11 best player Lalthankhuma'n midfield a luah lum ṭhat a pawimawh dawn a, tlarhnungah Lalchhawnkima tawnhriat a ṭangkai bawk ang. Coach Victor-a leh a hote tan I League kai thar Dempo an hneh a pawimawh hle.
Dempo lam hi
Dempo SC hi Indian football-a club sulhnu nei ṭha ber zinga mi an ni a, mahse Goan club vanglai hun a pel tawh. Sulhnu thlir chuan India ram football inelna sang ber National Football League leh I League-ah ṭum nga (2005, 2007, 2008, 2010, 2012) an champion tawh.
Mahse, Dempo hi kum 2015 khan I League aṭangin an relegate a, season khat hnuah I League khel turin inpettling mah se AIFF laka lungawi zingah an tel. Dempo hi Goan club dang Salgaocar FC leh Sporting Club de Goa te nen an inhnukdawk a, ngai an awh leh tawh lo.
Tun hnaiah Dempo hi an intuai thar a, season liam ta khan I League 2-ah pahnihna niin I League khel turin an tling. I League an inpettlin hnuhnun bera an player centre back pahnih Shallum Pires leh Ali Mohamed ten an la ho a, player naupangah rinna an nghat nasa.
Chutihrualin squad tih chak nan Syrian defender Shaher Shaheen an lalut a, ani hian Mohammedan SC-ah tawnhriat a nei tawh. Gokulam Kerala aṭangin Serbian midfielder Matija Babovic an lakluh bakah India rama vawi khat khelhna tur midfielder Damian Perez Roa an nei bawk.
A tawi zawngin Dempo-in Aizawl FC aiin sum an seng hnem a, Mizo club tan chak a harsa dawn. Chutihrualin Aizawl FC hi mahni muala khel tur an ni a, Mizo mipuiin an ṭawiawm ṭhat bawk chuan chak tura rinkai zawk an la ni tho.