Remsiami hoin India an champion

Lalremsiami Hmar hoin India hmeichhe hochey team chu Women's Asian Champions Trophy 2024 champion an ni. India hian final-ah China chu 1-0 in an hneh a, nomawi inchuhna inkhelah hian Mizo nula Remsiami hi 'Player of the Match' atan thlan a ni.

Rajgir Sports Complex Hockey Stadium, Bihar-ah Thawhlehni zan khan final khelh niin, India hian group match lama an hneh tawh China lamah goal an khung thei mai lo a, second half-ah inelna hmang ṭha tak Deepika Sehrawat chuan goal awmchhun hi a khung.

India nulate hian a vawi thum nan Women's Asian Champions Trophy 2024 an la a, Asian Hockey Federation buatsaih inelna lianah hian champion tam lamah world number 6 China an nih rual ta chiah a, mellung pawimawh an phun nghal tihna a ni.

Inelna thlengtu Bihar sorkar chuan India player zawng zawng tan hian Rs 10,00,000 ṭheuh an pek dawn bakah, coaching staff tan Rs 5,00,000 ṭheuh a pek tur thu an puang nghal. Hockey India pawhin player tin tan Rs 3,00,000 ṭheuh bakah coaching staff tan Rs 1,50,000 ṭheuh an pek tur thu an puang nghal bawk.

Mizo nula

Women's Asian Champions Trophy 2024 khelh zawh takah Lalremsiami hi match zawng zawngah a inlan kim vek a, goal thum a khung. Forward ni mah se team lamin an mamawh angin ball semtu atan hman a ni ṭhin a, an khingpui tan a hnawksak thei hle.

Paris Olympic an khelh phak lohna kha match khata an chak loh vang chauh a ni a, tunah chuan Olympic silver medalist China an hneh leh thei ta. Mizo nula Remsiami chuan, "Pathianin Asian Champions Trophy champion theia damna leh hriselna min pek avangin ka lawm hle.

"Champion ngei turin Pathian hnenah ka dil a, ka dilnate min tihhlawhtlinsak avangin ka lawm em em a, chuvangin tuna Asian Champion Trophy kan lak hi Pathian ropui nan lo ni se ka duh.

"Asian Champions Trophy hi kan team tan hian a pawimawh em em a, Paris Olympic-ah khan kan tling lo a, chumi hnuah kan team hian tournament kan khelh lehna hmasak ber a nih avangin team pawhin kan theihtawp kan chhuah a, kan tumna leh thawhrimna te Pathianin mal min sawm.

"Kum tharah Pro League khel leh tur kan ni a, chumi tur chuan theihtawpin kan inbuatsaih leh bawk ang," tiin Vanglaini a hrilh. Kolasib nula hian Mizoramin hockey khelhna tur hmunhma nei ṭha zual se la chuan tun aiin Mizo player-ten hma an sawn zual theih a beisei a, hockey chu Olympic khelh theihna hnai tak a ni tih a sawi bawk.