United-in Falcao chelh an tum lo

Manchester United manager Louis van Gaal-a'n nipui transfer atana thutlukna hmasa ber a siam a, chu chu Radamel Falcao chelh zui loh a ni.

Colombian forward Falcao hian season khat chhung loan-a khel turin Monaco aṭangin English club hi pound maktaduai 6-in a zawm a, kar khatah £265,000 (Rs 2,60,51,798) a hlawh. United hian contract-a an tarlan danin Falcao hi pound maktaduai 43.2-a chelh ngheh theih dan nei mah se hman zel tlakah an ngai lo.

Dutch manager Van Gaal chuan, "Falcao hi professional player ṭha bik a ni a, mihring mihrinnaah pawh a fel hle. A hma lam hun atan duhsakna ka hlan," tiin club website a hrilh.

Kum 29-a upa Falcao hian match 29-ah goal li chauh a khung a, match hnuhnung 13-ah goal a khung lo a, January 31-a Leicester City lama a goal khung kha United tana a khung hnuhnun ber a ni.

United supporter-te'n beseina sang tak nena an thlir Falcao hian Premier League match hnuhnung bera Hull City an khelh ṭumin inhliam vangin a khel lo a, Arsenal nena May 17, Pathiannia an inkhel ṭum kha United tana a inlan hnuhnun ber a ni. Hemi ṭum hian darkar khat hnuah Falcao hi Robin van Persie-a'n a rawn thlak a, a chhuah paha mipui lam hawia a kut vai kha United ṭantute a thlahna chu a ni ta a ni.

Dutch manager Van Gaal hian nikum nipui chawlh laiin Netherlands a enkawl avangin chawlh a nei meuh lo a, tun ṭumah hian chawlh rei zawk nei turin Portugal a pan. Kum 63-upa Barcelona manager hlui hian United team chu position tina an inrual khai loh thu a sawi reng a, chuvangin transfer-a thawm nei lian tura ngaih an ni.

Van Gaal chuan, "Manager ka ni a, player lut leh chhuak chu ka duhthlanna a ni tur a ni. Thil awlsam a ni lo a, club chuan ka thutlukna ngaihchan kha an tih tur a ni. Rim taka hnathawh a ngai a, kei aiin Ed Woodward a thawkrim zawk ang. Chawlh hmang turin ka kal dawn a, mah se biak pawh theih reng ka ni ang," tiin transfer chungchang a sawi.

Edward Gareth "Ed" Woodward hi British accountant a ni a, United-ah executive vice-chairman hna a chelh mek. Woodward hian transfer-a United ti hmingṭhatu David Gill a thlak a, Marouane Fellaini a lak nana pawisa a hman tam avang leh player ṭha an lak luh loh avangin sawisel a hlawh hle. David Moyes chet chhiatna chhana ngaih a ni bawk.

Kum hnihna erawh Van Gaal nen inkawpin player lak luh nan pound maktaduai 145.5 ngawt a seng a, a lakluh zingah Angel Di Maria, Radamel Falcao leh Victor Valdes te an tel avangin fak a hlawh hle.