Spain-in Switzerland an hneh hram

UEFA Nations League-ah Spain chuan hun pek belha penalty an khung hmangin Switzerland chu 3-2 in an hneh hram a, league round-a an match khelh tur chu an khel zo ta - Thawhṭanni zana team pahnih intawn hma hian an khelh tur a chiang tawh sa hrim hrim bawk.

Spain hian Yeremy Pino hmangin minute 32-naah goal hmahruai an khung a, Switzerland tan Joel Monteiro chuan si phurh hi a sut. Mahse, Spain tan Bryan Gil chuan khung ve lehin, 2-1 a ni. Swiss team an beidawng duh bik lo - hun tawp nan minute nga chiah a awm tawh tihah penalty an hlawh chhuak a, Andi Zeqiri chuan goal-ah chantirin, 2-2 a ni.

Team pahnih hi an inhnehtawk mai dawn niin a lang hman. Mahse, Spain-in ngaihdan dang an nei a, hun pek belhah Bryan Zaragoza chuan penalty hmanga goal khung lehin, 3-2 in Spain an chak.

Inkhel result-in team pahnih dinhmun erawh a sawi danglam phah lo - an inhmachhawn hma pawhin Spain hi group winner an ni chiang tawh a, Switzerland-in a mawngphah an luah chiang bawk.

Group 4 inkhel dangah Denmark-in Serbia chu 0-0 in an chelh a, quarterfinal an lut ve bawk - Nations League-ah hian a thiam pariat a chiang tawh a, Portugal, Croatia, France, Italy, Germany, Netherlands, Spain leh Denmark ten quarterfinal an lut a ni.

An khuaah Pedri

Barcelona midfielder Pedri-te khuaah Spain an inkhel a, an penalty hlawhchhuah pawh Pedri hi pettir a ni. Mahse, minute 32-naa a penalty pet hi Pedri hian a khung thei lo a, Swiss keeper Yvon Mvogo chuan a dansak.

Mahse, a per lehlam hi Pedri ang thoa Canary Islands tlangval Pino chuan goal-ah a lo chantir a, Villarreal forward tan Spain jersey nena goal thum a khungna chiah a ni.

Spain-in awlsamin hnehna an chang dawn emaw an ti a, mahse, goal dang lut loa chawlhlawk hman niin, 1-0 in hma an hruai a, an beisei ang ngawtin mikhual lakah awlsamin an khel bik lo.

Minute 63-naah Monteiro chuan Switzerland tan si phurh a sut ta nge nge a, 1-1 a ni. Minute nga a liam a, La Roja bawk kan hmu nawn - Bryan Gil chuan chak an tum tih pholangin a khung ve leh a, 2-1 a ni.

A tawpah Spain

Mikhual team ni mah se, Switzerland an zam lo a, point hnih nen chauha League B lama liam thlak an duh bik lo. Hun tawp nan minute nga chiah a awm tawh tihah Zeqiri chuan a khung ve leh a, 2-2 a ni der!

Hun tlem tawh dan ngaihtuahin team pahnih hi point an insem mai dawn niin a lang hman a, mahse, European champion-in mahni muala chak zawh loh an lo duh miah lo - hun pek belhah penalty an hlawh chhuak a, a pet turin a hlawh chhuaktu Bryan Zaragoza a lo pen chhuak.

Osasuna striker hian ram tana a goal hmasa ber ni turin a khung zui a, 3-2 in Spain an chak. Spain tan defender Aitor Paredes, Pablo Barrios leh Samu Omorodion ten ram tana an match hmasa ber an khel ṭheuh a, an tan zan chhinchhiahtlak a ni.

Kum 2024 hi Spain tan chuan kum ṭha a ni - Colombia (1-0) ngam loin kum bul ṭan mah se, a hnu match 16 an khelhah tlawm an nei lo a, hetih chhung hian Euro 2024 nomawi an chawi bawk.