Portugal chakna Ronaldo

Cristiano Ronaldo chu Portugal chakna a la ni zel - a kum tam deuh tawh mah se goal khung a la bansan thei lo, goal hnih khungin an ram chu Poland lakah 5-1 in a chakpui.

Zirtawpni zan Nations League inkhelah Ronaldo hian penalty a khung, inringtawk tak maiin penalty chu panenka-in a khung a, a hnuah boruaka ball kang lai chu mawi lutukin a bin lut bawk.

Kum 39 mi Ronaldo hian goal hnih a khung bakah Pedro Neto-a goal khung tur a siamsak - Portugal goal dang hi Bruno Fernandes leh Rafael Leao te khung niin, Poland goal neih chhun hi Dominik Marczuk-a khung a ni thung.

Hnehna changtu Portugal hian League A Group 1-ah match nga an khelh aṭangin point 13 an hmu a, quarterfinal an lut. Poland erawhin point li chauh an la hmuh avangin an tlang thei tawh lo a ni.

Portugal tan match 217 a khelh aṭanga goal 135 khungtu Ronaldo chuan, "Kum 40 ka tling hnai tawh a, ka chawlh hun tur min zawt fo pawh hi a mak hran lo, tun aṭanga kum khat hnuah nge kum hnih hnuah a nih dawn ka sawi thei rih lo.

"A pawimawh ber chu nuam ti takin football hi ka la khel reng em, tih a ni a, phur leh thatho taka ka inkhelh theih chhung chu ka chhunzawm ang, chutiang ka tawn loh hunah chuan ka chawl ang," tiin a sawi a, tunah chuan chawlh mai a la tum lo niin a lang.