Santosh Trophy: Mizoram an tla!
India rama state leh state inelna sang ber Santosh Trophy-ah Mizoramin beisei tur an nei tawh lo - kum 2014-a champion nomawi an chawi hnuah Mizoram tan Santosh Trophy an khelh phak loh vawi thumna tur a ni a, a na vawng vawng ang.
Mizoram hian nimin khan hmelma kumhlun Manipur an hmachhawn a, nikum final round-a an ngam tawh loh team hian 2-1 in an hneh nawn - Mizoram hliamah chi chu phul nawnin a awm a, a na takzet.
Agartala khawpuia Manipur an tawn hmain Mizoram hian Tripura an hmachhawn a, 4-1 zetin an mualpho tawh. Mahse, Manipur an hneh chuan beiseina an la nei thei - F. Lallawmkima hmangin goal pawh an khung hmasa zawk a, beiseina a sang hman.
Mahse, match hmasa bera Sikkim sawptu Manipur hian Shunjanthan Ragui leh Naoroibam Romen Singh-a goal hmangin Mizoram an chhanglet a, 2-1 a hnehna changin Mizoram an tla ta daih! Mizoram hian Thawhlehni zing dar 9:00-ah Sikkim an la hmachhawn dawn a, result-in awmzia a nei tawh lo thung.
Beiseina neitu
Mizoram coach B Malsawmzuala'n chak a duh a, Tripura laka bul ṭan aṭangin player paruk ngawt a thlak danglam - inkhel hmasa zawka bul ṭan zingah A. Vanlalremruata, H. Lalbiakthanga, Lalngaihsaka, Crespo Vanlalhriatpuia, Moses Lalrinzuala leh Lalkhawpuimawia te chu bench-ah dah an ni.
Sawmtea'n thutlukna a siam sual lo tih a lang hma. Minute 26-naah Mapuia aia luhtir, Mizoram Police forward F. Lallawmkima'n goal hmahruai a khung a, match hmasa bera chak lo Mizoramin beiseina thar an nei.
Mahse, first half hun pek belhah thil pawi a thleng - Manipur-in penalty an hlawh chhuak a, Shunjanthan Ragui chuan si phurh sut nan a khung a, Mizo keeper ṭha T Mawia a bum.
Mizoram an tho leh tawh lo - second half ṭantirah Manipur bawkin goal an khung leh a, corner aṭanga ball kal chu Naoroibam Romen Singh-a'n hmahruaina goal ni turin a khung a, goal dang a lut tawh lo.
Kan hre lo!
Mizoramin beiseina sang tak nen inelna neihna hmun Agartala an pan a, Mizoram Premier League khelh zawh hnu lawka training nei an nih avangin player pawh an in 'fit' ṭha a, tawnhriat nei ṭha player leh naupang zawk an inchawi mawi tawk hle.
Coach Sawmtea pawhin a naute chungah rinna a nghat lian a, "Kan thawhhona hi a chhe thut a nih loh chuan sang tak thleng turin kan bei dawn," tiin Vanglaini a hrilh a, nomawi chawi ngei a duh.
Mahse, match hmasa berah an chak lo nghal a, tunah Manipur an ngam lo leh ta. Sawmtea chuan, "Rin loh takin Tripura kan hneh lo a, player lam pawh kan infuih nasa. Thawhleh ngei tumin kan bei a, mahse, kan hlawhtling ta lo.
"Hriatthiam harsa ka ti. Kan theihtawp chu kan chhuah a, mahse, kan tisual leh ṭhin. Kan tihsual vangin min hrem zel a, match hmasa zawkah pawh kan tihsual vang tho a ni a, kan hun a la inher chhuak lo a ni ang e," tiin Vanglaini a hrilh.