Mizo pali telna India inlan dawn

International break lai a ni a, India pawh an awm mai mai bik lo - zanin dar 7:30 hian Hyderabad khawpuiah friendly match khel turin an inlan ve dawn a, Malaysia an mikhual ang.

Blue Tigers coach Manolo Marquez chuan India squad-ah hian Mizo player pali a ko a, Mumbai City captain Lallianzuala Chhangte, Mohun Bagan midfielder Lalengmawia Ralte (Apuia), Inter Kashi forward Edmund Lalrindika leh Mumbai defender Hmingthanmawia Ralte (Valpuia) te an ni.

GMC Balayogi Stadium, Hyderabad-a inkhel tur hi television-a en duh tan Sports 18-ah en tur a ni a, Jio Cinema app-ah online-in a en theih bawk.

Malaysia chu

Pau Martí Vicente kaihhruaina hnuaiah Malaysia-in insiamṭhat hna an thawk a, Spanish coach kaihhruaina hnuaia match li an khelhah vawi thum chakin, vawi khat an tlawm a, an insiamṭha sawt hle.

An ngam loh hi New Zealand (4-0) ni mah se, Philippines (2-1), Lebanon (1-0) leh Laos (3-1) an hneh thei a, India hneh lo turah an inruat lo ang - India hian thla 13 liam ta khan Merdeka tournament-ah Malaysia hi hmachhawnin, 4-2 in an tlawm.

Blue Tigers hian international friendly-ah Malaysia hi vawi 33 hmachhawn tawhin, anni aia ram hmachhawn ngun an nei lo - ngam pawh an inngam tawk hle. Match 12 ve ve hnehna an chang a, match riat an in draw thung.

An ṭha em?

Malaysia hian player langsar sawi vul chuk tur an nei bik lo. Chutihrual chuan, kum 27 mi, Safawi Rasid hi ven bik a sual lo ang - Portuguese top division club Portimonense tan pawha lo khel tawh winger hian ram tan match 63-ah goal 22 a khung thei.

Midfield-ah ram tana vawi 39 ngawt inlan tawh Syamer Kutty Abba chu rinrawl tur a nih a rinawm a, number 8 hatu Stuart Wilkin pawhin mawhphurhna a hlen ṭhat chuan India tan buaipui tham a tling ang.

Tlarhnung lamah Thai club Buriram United tana khel mek Dion Cools hi innghahna tur a ni leh dawn. Belgium Under-18, U19 leh U21 tan pawha khel tawh defender hi Belgian club ṭha Club Brugge tana match 100 chuang lo khel tawh a ni a, paltlang a harsa dawn.

India hi

Manolo Marquez kaihhruaina hnuaiah India-in match thum khel tawhin chak an la nei lo a, Blue Tigers hian Igor Stimac ban a, Spanish coach an la lut hi an tifuh nge, an tisual dawn hriatthiam a la harsa rih.

FC Goa coach ni bawk Marquez-a hnuaiah India hian Mauritius (0-0) leh Vietnam (1-1) an inhnehtawkpui a, Syria (3-0) lakah an tlawm bawk. Chutihrual chuan India hian coach thar hnuaiah insiamrem an mamawh a, zaninah a result a lang ṭan tura beisei a ni.

Lianzuala chuan, "A ruahmannate pawh kan hrethiam a, a duhdanin kan khel ṭan," tiin a lo sawi tawh a, coach thar hnuaiah system thar a awm ṭhin avangin insiamrem tura hun an mamawh thu a sawi.

Engtin nge?

India coach Marquez-a'n a naute a khelhtir ṭhin dan enin, 3-5-2 formation a hman a rinawm a, tlarhmaah tun hnaia harhtharna chang Farukh Choudhry leh Indian player ṭha ber dinhmun luah mektu Lallianzuala Chhangte te an inkawp thei ang.

Player pahnih thlawp turin Brandon Fernandes a awm thei ang a, a hnung chiahah Apuia leh Suresh Singh an awm thei ang - mual sirah Roshan Singh leh Asish Rai an awm ang a, tlarhnungah centre back pathum awm tura ngaih a ni.

Chuti a nih chuan Anwar Ali leh tawnhriat nei ṭha Sandesh Jhinghan leh Rahul Bheke te an ding ho thei ang a, si ban nghak turin Gurpreet Singh Sandhu a awm thei dawn bawk.